१२२२ सवारी चालक ट्राफिक कारबाहीमा

लिम्वूवान डट व्लगस्पोट डटकम,काठमाडौं

मादक पदार्थ सेवन गरी सवारी चलाउने एक हजार दुई सय २२ जना जना चालकलाई ट्राफिक प्रहरीले कारबाही गरेको छ । रातको समयमा दुर्घटना बढेपछि ट्राफिक प्रहरीले चेकिङ कडा पारेको थियो । महानगर ट्राफिक प्रहरी महाशाखाले मंसिर १७ गतेदेखि मादकपदार्थ सेवन गरी सवारी चलाउने चालकलाई कारबाही तिब्र बनाएको हो । कारबाहीसँगै दुर्घटनामा पनि कमी आएको महाशाखा प्रमुख डिआजी गणेशराज राईले दावी गरे । त्यस्तै कारबाहीमा पर्ने व्यक्तिका परिवारका सदस्य पनि खुसी रहेको उनले बताए । ट्राफिक र प्रहको संयुक्त प्रयासमा मंसिर १७ देखि पुस १३ सम्म १ हजार २ सय २२ जनालाई नियन्त्रणमा लिएको ट्राफिकले जनाएको छ । त्यसमध्ये ९ सय ७६ जनालाई १ हजार रुपैयाँका दरले जरिवाना गरेको छ । ९ सय ७६ जनालाई जरिवाना गराउँदा ९ लाख ७६ राजस्व संकलन भएको महाशाखाका प्रहरी नायव निरीक्षक कमानसिंह खत्रीले जानकारी दिए । सबैभन्दा बढी कारबाही सुरुको दिनमा १ सय ६८ जना, दोस्रो दिन १ सय ५० जना, पुस ९ मा १ सय ६५ जना र १० गते १ सय १५ जना नियन्त्रणमा लिएको उनले बताए । प्रहरी हिरासतमा जाकिनुपर्ने कल्पनासम्म नगरेका कतिपय डाक्टर, इन्जिनियर, बैंकर, निजामति कर्मचारी र सैनिक अधिकृतले हातमा हत्कडी लगाइएको अवस्थामा मेडिकल जाँचमा उपस्थित भई चिसो छिंडीमा रात बिताउनुपरेको छ । मदिरा सेवन गरेर सवारी चलाउन कानुनले निषेध गरेको छ । राति सडकमा सवारीको चाप घट्नासाथ प्रहरी चेकजाँच गर्न निस्कने गरेका छन् । यस क्रममा प्रहरीले सवारी चालकको मुख सुँघ्छन् । गन्ध आउनासाथ तिनलाई नियन्त्रणमा लिएर मदिरा सेवन प्रमाणित गर्न अस्पताल लैजाने गरिएको छ । डाक्टरले मदिरा सेवन प्रमाणित गरेपछि प्रहरी कार्यालयमा लगेर थुनिन्छ । भोलिपल्ट उपत्यकाभरी पक्राउ परेका चालकलाई महाशाखामा भेला गरेर एक घन्टाको कक्षा सञ्चालन गर्ने गरिएको छ । हिरासतमा रात बितायनु पर्ने भएपछि मदिरा सेवन गरेर सवारी चलाउने छाडापन घट्न थालेको ट्राफिक प्रहरी महाशाखाले जनाएको छ । आफ्नै गल्तिले गर्दा कतिपयले टाइसुटमै चिसो छिंडिमा रात बिताउने गरेका छन् ।