लिम्वूवान डट व्लगस्पोट डटकम,काठमाडौं
१६ असोज/ प्रमुख तीन राजनीतिक दलका शीर्ष नेताले मुलुकको स्थायित्वका लागि दिगो शान्तिको आवश्यकतामा जोड दिएका छन् । शान्तिप्रक्रियालाई तार्किक निष्कर्षमा पुर्याउन र निर्धारित समयभित्र
नयाँ संविधान निर्माण गर्न अहिंसावादी सिद्धान्त महत्त्वपूर्ण रहेको उनीहरूले बताए । अन्तर्राष्ट्रिय अहिंसा दिवस तथा महात्मा गान्धीको १४०औं जन्मजयन्तीका अवसरमा तक्षशिला एकेडेमीले राजधानीमा गरेको कार्यक्रममा तीन शीर्ष नेता एकै मञ्चमा देखिएका थिए । कार्यक्रमलाई सम्बोधन गर्दै काङ्ग्रेस सभापति गिरिजाप्रसाद कोइरालाले हिंसाबाट कसैले केही पनि प्राप्त गर्न नसक्ने बताए । कोइरालाले महात्मा गान्धीसँग भेट गरेको प्रसंग उठाउँदै उनको अहिंसावादी नीतिको आफूले सधैं अनुसरण गरेको चर्चा गरे ।
'अहिंसा र शान्तिबाटै मुलुकको विकास र समृद्धि हुन्छ,' उनले भने, 'दस वर्ष युद्ध गरेर पनि बन्दुक फालेर शान्तिप्रक्रियामा आउनुभएकोमा प्रचण्डजीलाई बधाई दिन चाहन्छु ।' कोइरालाले माओवादीलाई जनताले चाहेको शान्तिका लागि थप जिम्मेवार हुनसमेत आग्रह गरे । माओवादी अध्यक्ष प्रचण्डले अहिंसाका लागि सबैले कानुनको पालना गर्नुपर्ने बताए । राष्ट्रपतिले संविधानको मर्मविपरीत कदम चालेकोले दिगो शान्तिप्रति आशंका उब्जिएको उनको भनाइ थियो । शान्तिसम्झौताको प्रमुख सर्त सेना समायोजन रहेको भन्दै उनले दसवर्षे जनयुद्ध र १९ दिने जनआन्दोलनबाट प्राप्त उपलब्धि सबै मिली जोगाउनुपर्ने बताए ।
मुलुक शान्तिप्रक्रियामा प्रवेश गरिरहेको अवस्थामा गान्धीको अहिंसावादी दर्शनले विशेष महत्त्व राख्ने पनि उनको भनाइ थियो । 'शान्तिप्रक्रियालाई निष्कर्षमा पुर्याउन अन्तरिम संविधानको पालना हुनुपर्छ, लोकतान्त्रिक मूल्य, मान्यता र जनआन्दोलनको भावनालाई दलहरूले आत्मसात् नगर्दा समस्या देखिएको हो,' प्रचण्डले भने ।नेकपा एमालेका अध्यक्ष झलनाथ खनालले शान्तिप्रक्रिया र दिगो विकासका लागि राजनीतिक दलहरूबीच सहमति र सहकार्यको विकल्प नभएको बताए । खनालले नेपालको शान्तिप्रक्रियामा अन्तर्राष्ट्रिय क्षेत्रबाट भइरहेको सहयोगको सराहना गर्दै निर्धारित समयभित्र नयाँ संविधान लेख्न राजनीतिक दलहरूबीच उच्च सहमतिको आवश्यकतामा जोड दिए । संयुक्त राष्ट्रसंघले सन् २००७ देखि आजको दिन अर्थात् अक्टोबर २ लाई विश्व अहिंसा दिवसको रूपमा मनाउँदै आइरहेको छ ।
