खम्बुवान राज्य परिषदको ऐतिहासिक राष्ट्रिय सम्मेलन हुँदै

लिम्वूवान डट व्लगस्पोट डटकम,काठमाडौं

संघीय लोकतान्त्रिक गणतन्त्र नेपालअर्न्तर्गत् जातीय पहिचान र ऐतिहासिक पृष्ठभूमिको आधारमा आत्मनिर्णयको अधिकार र स्वशासनसहितको खम्बुवान स्वायत्त राज्यको माग गर्दै आएको खम्बुवान स्वायत्त राज्य परिषदको प्रथम राष्ट्रिय सम्मेलन गाईघाट त्रियुगा उदयपुर, खम्बुवानमा यही माघ ११, १२ र १३ गते भव्यताका साथ सम्पन्न हुन गइरहेको छ । संघीय लोकतान्त्रिक राष्ट्रिय मञ्च सम्बद्ध खम्बुवान स्वायत्त राज्य परिषदको उक्त राष्ट्रिय सम्मेलनले खम्बुवान राज्यको प्राप्तिको र विकासका लागि ऐतिहासिक राष्ट्रिय सम्मेलन गर्दै खम्बुवान राज्यको संवैधानिक सुनिश्चितताका लागि ऐतिहासिक निर्णयहरु गर्दै विभिन्न दस्तावेजहरुसमेत पारित गर्ने कार्यक्रम रहेको परिषदका अध्यक्ष इन्द्रहाङ खम्बूले बताएका छन् । त्यसैगरी, खम्बुवान स्वायत्त राज्य परिषदका कार्यवाहक महासचिव किरण खम्बूका अनुसार यसै सम्मेलनबाट खम्बुवानको विधान तथा साङ्गठानिक प्रतिवेदन र घोषणा-पत्र जारी गर्दै नयाँ राज्य कार्य समिमि समेत चयन हुने बताएका छन् ।खम्बुवानको यस ऐतिहासिक सम्मेलनको सफताका लागि खम्बुवानका सबै जिल्ला, काठमाडौं उपत्यकाबाट समेत प्रतिनिधिहरु आइसकेको छन् । त्यसैगरी, यो सम्मेललाई सहयोग गर्न संघीय लोकतान्त्रिक राष्ट्रिय मञ्च तथा सम्बद्ध लिम्बुवान र तामाङसालीङका शीर्ष नेतृत्वहरुसमेत उदयपुर खम्बुवानमा आइसकेका छन् । कार्यक्रमको तयारी स्वरुप त्रियुगा नगरपालिका र यहाँका मुख्य चोकहरुलाई संघीय मञ्च र खम्बुवान स्वायत्त राज्य परिषदका झण्डाहरुले सिँगारिएको छ ।