परीक्षा निरीक्षकले परीक्षा हलमै यौन दुर्व्यवहार गरेको आरोप

लिम्वूवान डट व्लगस्पोट डटकम,काठमाडौं

विश्वविद्यालयमा स्नाकोत्तर तहमा अध्यनरत १३ छात्राहरुले परीक्षा निरिक्षणमा खटिएका निरीक्षकले परीक्षा हलमै यौन दुर्व्यवहार गरेको आरोप लगाएका छन् । पीडितहरुले मंगलबार पत्रकार सम्मेलन गरी त्रिचन्द्र क्याम्पसमा भदौ ११ गते परिक्षा दिइरहेको बेला निरीक्षकहरु प्रविणकुमार झा र दीपेन्द्रकुमार गुप्ताले आफूहरुमाथि यौन दुर्व्यवहार गरेको आरोप लगाए । सामाजिक न्याय विषयको जाँच दिएरहेका बेला झा र गुप्ताले पछाडिबाट चलाएको, छोएको र संवेदनशील अंगमा हात लगेको उनीहरुले बताएका छन् । १३ छात्रालाई छुट्टाछुट्टै रुपमा ती दुई निरीक्षकले सुम्सुम्याउने, परिक्षामा मद्दत गरिदिन्छु भन्दै फोन नम्बर माग्ने तथा अंकमाल गरेको पीडितमध्येकी एक छात्राले जानकारी दिइन् । उनीहरुले दुर्व्यवहारविरुद्ध राष्ट्रिय महिला आयोग, प्रहरी, त्रिभुवन विश्वविद्यालय, त्रिचन्द्र क्याम्पस, मानवअधिकार आयोग तथा विभिन्न संघसंस्थामा उजुरी दिएका छन् । पीडकहरुलाई शैक्षिक गतिविधिमा रोक तथा उनीहरुमाथि कारबाही हुनुपर्ने, छात्राको सुरक्षा हुनुपर्ने, उत्तरपुस्तिकाको सुरक्षा हुनुपर्ने माग उनीहरुले गरेका छन् । परीक्षा हलमा ती शिक्षकविरुद्ध बोल्दा आफ्नो जाँच नै रद्द गर्ने धम्की दिएका कारण पनि आफूहरुले बोल्न नसकेको उनीहरुको भनाइ थियो ।