लिम्वूवान डट व्लगस्पोट डटकम,काठमाडौं
माघ २० - कानुन तथा न्याय मन्त्रालयका सचिव भेषराज शर्माले कानुन किताब व्यवस्था समितिको नयाँ गाडी अनधिकृत रूपमा खोसेर चढ्न थालेका छन् । शर्माले मन्त्रालयले दिएको आफ्नो गाडी थोत्रो भएको दाबी गर्दै बिना हैसियत स्वायत्त निकायको बा ९ च ४६६५ नं. को कार लगेर चढ्न थालेका हुन् । समितिले आफ्ना सदस्यसचिव तोया अधिकारी र कामु मुख्य निर्देशक रामबहादुर बस्नेतलाई कार्यालय आउजाउ प्रयोजनका लागि दुई साताअघि हुन्डाईको आईटेन कार खरिद गरेको थियो । जसका लागि खरिद गरिएको हो, उनीहरूले चढ्न नपाउँदै कानुन सचिव शर्माले आफ्नो मन्त्रालय मातहतको समितिको गाडी जबर्जस्ती लगेका हुन् । समिति कानुन किताबको प्रकाशन र बिक्री तथा सरकारी दस्तावेज अनुवाद र प्रमाणीकरणका माध्यमबाट हुने आफ्नै आम्दानीमा सञ्चालित हुँदै आएको छ, यसमा सरकारी अनुदान छैन । कानुन सचिवले समितिको पदेन अध्यक्ष भएको प्रभावमा उक्त गाडी लगेको र त्यही कारण समितिका सदस्यसचिव र कामु मुख्य निर्देशक बोल्न नसकेको स्रोतले उल्लेख गरेको छ । पदेन अध्यक्षले समितिबाट गाडी पाउने कुनै व्यवस्था छैन र यसअघिका कुनै पनि कानुन सचिव कसैले पनि समितिको गाडी चढ्ने गरेका थिएनन् ।
