ग्यास ओसार्ने गाडी नियन्त्रणमा लिएर बाँडियो

लिम्वूवान डट व्लगस्पोट डटकम,काठमाडौं

माघ १९- लामो समयदेखि खाना पकाउने ग्यास नपाएर आजित सर्वसाधारणले सिलिन्डर ओसार्ने गाडी नै नियन्त्रणमा लिन थालेका छन्। हिमाल ग्यासका सिलिन्डर बोकेर बनेपाबाट काठमाडौं आउँदै गरेका तीन टि्रप गाडी बुधबार बिहान भक्तपुर सल्लाघारीका स्थानीयले नियन्त्रणमा लिए। बनेपाको उक्त उद्योगबाट काठमाडौं डिपो निम्ति तीन टि्रप ढुवानी हुँदैछ भन्ने जानकारी पाएपछि स्थानीयले सल्लाघारीको बीच बाटोमै रोकेर सिलिन्डर बाँडेका थिए। नेपाली कांग्रेसका जिल्ला नेता दुर्लभ थापाले यसको नेतृत्व गरेका हुन्। उनका अनुसार बा५च ६०५६, बा५च ९४३५ र बा८च ४३२ नम्बरका गाडीमा २ सय ८० सिलिन्डर थिए। ग्यास नपाएर बिहान-बेलुकी भात पकाउनै समस्या परेपछि बाध्य भएर गाडी नियन्त्रणमा लिनुपरेको उनले बताए। 'सरकारले तोकेकै मूल्य तिरेर ग्यास बाँडेका हौं,' उनले नागरिकसँग भने, 'खुद्रा बिक्रेतादेखि डिपोसम्म धाउँदा पनि उपभोक्ताले ग्यास पाएका छैनन्, चुल्हो बाल्न नसकेर सुत्केरीले दालमोठ-चिउरा खानुपरेको छ, हैरान भएर यस्तो कदम चाल्नुपर्‍यो।'बीच सडकमा बिक्री सुरु भएपछि सल्लाघारीमा स्थानीय उपभोक्ताको भिड लागेको थियो। स्थानीयलाई लाम बस्न लगाएर प्रतिसिलिन्डर १ हजार ४ सय १५ रुपैयाँका दरले वितरण गरेको थापाले जानकारी दिए। दुवाकोट, कटुन्जे, सिपाडोल, सूर्यविनायक, दूधपाटी, बाराही, सुकुलढोका, वंशगोपाल लगायत क्षेत्रबाट समेत उपभोक्ता आएका थिए। 'जुनसुकै वस्तुमा उत्पादनस्थल नजिकका ग्राहकको पहिलो हक लाग्छ,' थापाले भने, 'भक्तपुरको बाटो हिँडाउने तर यहीँका ग्राहकलाई नदिने भन्ने हुँदैन।'उपभोक्ताले तोकिएको पैसा तिर्छु भन्दा पनि ग्यास नपाएका बेला उद्योगहरूले कालोबजारी गरिरहेको थाहा पाएर नियन्त्रणमा लिएको उनले दाबी गरे। 'वाइसिएल, युथफोर्स भएको भए सित्तै बाँड्थे,' उनले भने, 'हामीले त पैसा दिएर बाँडेका छौं, कसैले गैरकानुनी भन्छ भने भनोस्।'सरकारी समाचार संस्था राससले गाडी चालक राजाराम भुजेललाई उद्धृत गर्दै 'अन्तिम समयमा आएका केही व्यक्तिले जर्बजस्ती ग्यास झिकेर लगेको' जनाएको छ।