देशकै सबैभन्दा बढी विद्युत् चुहावट बर्दियामा

लिम्वूवान डट व्लगस्पोट डटकम,काठमाडौं

नेपाली जनता लोडसेडिङको मारमा परिरहेकै बेला विद्युत् प्राधिकरणको अध्ययनले देशको सबैभन्दा बढी विद्युत् चुहावट हुने जिल्लामा बर्दियालाई देखाएको छ । प्राधिकरणको अध्ययनले बर्दियामा ५१ प्रतिशत चुहावट हुने गरेको बताएको हो । प्राधिकरणको शाखा प्रमुख चुट्टन श्रीवास्तवले देशकै बढी विद्युत् चुहावट हुने जिल्लामा परेकाले यसलाई रोक्न कठोर कदम चालिने बताएका छन् । जिल्लामा विद्युत् जडान गरेका ४२ हजार ग्राहक छन् । ती मध्ये कतिपयले मिटरको तार हटाएर हुकबाट विद्युत् चोर्ने गरेको पाइएको छ । चुहावट हुने घर , पसल, होटल, कारखानाधनीलाई पक्राउ गर्ने योजना बनाएको र आवश्यक परे थुनामा राखेर कारबाही गर्न निर्देशन दिएको शाखा प्रमुख श्रीवास्तवले बताएका छन् । ६ महिना अघि प्राधिकरणले हुकबाट विद्युत् चुहावट रोक्न अभियान थालेको थियो तर कानुनी कारबाही नभएकाले विद्युत् चोर्ने फेरि सक्रिय भएका थिए । विद्युत् प्राधिकरणले जिल्लामा कारवाही स्वरुप थप १ देखि ५ घण्टासम्म लोडसेडिङ बढाएको छ ।