News

Feb 3, 2009

पेट्रोलियमको मूल्यमा कमी, हवाइ इन्धन पनि समायोजन

लिम्वूवान डट व्लगस्पोट डटकम,काठमाडौं
नेपाल आयल निगम लिमिटेडले अन्तर्राष्ट्रिय बजार मूल्यलाई आधार मानी प्रत्येक महिना पेट्रोलियम पदार्थको मूल्य समायोजन गर्ने नीति अबलम्बन गरेअनुसार पेट्रोलियम पदार्थको मूल्य सोमबार पुन समायोजन गरेको छ । निगम सञ्चालक समितिको बैठकले हाल कायम रहेको प्रति लिटर पेट्रोलको मूल्यमा ३ र डिजेल तथा मट्टतिलको मूल्यमा २ रुपैयाँले कमी गरेको छ ।एलपी ग्यासको मूल्यमा भने प्रति सिलिन्डर २५ रुपैयाँ घटाइएको छ । यो मूल्य सोमबारै रातिदेखि लागू हुने निगमले जनाएको छ । काठमाडौ उपत्यकाका हकमा सरकारको निर्णयअनुसार पेट्रोल र डिजेलको खुद्रा मूल्यमा लागिआएको प्रतिलिटर ५० पैसा प्रदूषण नियन्त्रण शुल्क कायमै राखिएको छ ।हाल समायोजन भएको मूल्यअनुसार काठमाडौं उपत्यकामा पेट्रोलको खुद्रा मूल्य ७७ रुपैयाँ ५० पैसा तथा डिजेल र मट्टतिेलको खुद्रा मूल्य ५७ रुपैयाँ ५० पैसा प्रति लिटर कायम गरिएको छ । एलपी ग्यासको हकमा काठमाडौ उपत्यका, पोखरा, नेपालगन्ज, भैरहवामा एक हजार १ सय २५ रुपैयँ प्रति सिलिन्डर कायम गरिएको छ भने तराइका अन्य जिल्लामा एक हजार १ सय ५ हुनेछ ।हवाइ इन्धनको मूल्यमा अन्तर्राष्ट्रिय उडानतर्फ प्रतिकिलोलिटर अमेरिकी डलर १०० कम गरी साविकको अमेरिकी डलर एक हजारबाट अमेरिकी डलर १०० घर्टाई ९०० अमेरिकी डलर कायम गरिएको छ भने आन्तरिक उडानतर्फ प्रतिलिटर ८५ रुपैयँबाट ५ घर्टाई ८० रुपैयाँ प्रति लिटर निर्धारण गरिएको छ ।

प्रतिबन्धित मुलुक पठाउने समूहको नाइके दुबइमा पक्राउ

लिम्वूवान डट व्लगस्पोट डटकम,काठमाडौं
प्रतिबन्धित मुलुक इराक तथा अफगानिस्तान पठाउने एक समूहको नाइकेसहितका केही नेपालीलाई दुबइमा पक्राउ गरी सार्वजनिक गरिएको छ । गाउँका सोझा नेपालीलाई एकैबोलीमा विश्वास दिलाएर महँगो शुल्क लिने तथा प्रतिबन्धित मुलुक पठाउने एक दलालको समूहलाई प्रवासी नेपालीको सहायतामा प्रहरीले पक्राउ गरेको हो ।पक्राउ पर्नेमा गोरखाका दामोदर गिरी रहेका छन् । गिरीले १०० भन्दाबढी नेपालीलाई प्रतिबन्धित मुलुक इराक र अफगानिस्तान पठाएको पनि स्वीकार गरेका छन् । पक्राउ परेका गिरीसँग संलग्न शंकर बोगटीले २५० नेपालीलाई इराक पठाएको स्वीकार गरेका छन् । उनीहरूलाई जनप्रगतिशील मञ्चले दुवइमा पक्राउ गरी प्रहरीलाई जिम्मा लगाएको सञ्चारमाध्यमले जनाएका छन् ।पक्राउ परेका उनीहरूले नेपालीलाई प्रतिबन्धित देशमा पठाउने एक शक्तिशाली गिरोह नै बनेको बताएका छन् ।उनीहरूका अनुसार मानव तस्करको सो गिरोहमा चितवनका बिष्णु पाण्डे र राजन खतिवडा, झापाका तेज आचार्य र नरेन्द्र पौडेल, काठमाडौका टेकराज भण्डारी,कृष्ण आचार्य र कुमार बुढाथोकी, इन्द्र काफ्ले, इन्द्र थापालगायत छन् ।त्यस्तै इराक जान दुवइ पुगेका केही युवाले दिएको जानकारीअनुसार दिनेश अर्याल, सुरेस पौडेल, गणेश कटुवाल, पोखराका नेत्रबहादुर थापा, शेरबहादुर थापा, बुद्धनगर चितवनका राम कुँवर, बाग्लुङ्का कृष्णबहादुर पुन, क्षितिज म्यानपावरमा काम गर्ने सतिस क्षेत्री, टेकबहादुर थापा, जोनी थापा, नारायण ढुंगाना, सुरेस पौडेल, शर्मिला घिसिङ, बर्दियाका गणेश कटुवाल छन् ।उनीहरूले नेपालीमात्र नभएर भारतीय, श्रीलङ्कन, दक्षिण कोरियाली र नेपाली नागरिकलाई पनि इराक पठाउने गरेको बताएका छन् । उनीहरूलाई भारत, इजिप्ट, फिलिपिन्स, अरव र ब्रिटेनका दलालले पनि सहयोग गरिरहेको र इराकमा बसेका टेकराज भण्डारी मानव ओसारपसारमा सक्रिय रहेको दामोदर गिरीले बताए ।

Feb 2, 2009

दूतावास खोल्न दक्षिण अफ्रीकाको आग्रह

लिम्वूवान डट व्लगस्पोट डटकम,काठमाडौं
नेपालका लागि दक्षिण अफ्रीकाका राजदूत बुसिव्य माउरिन फेटोले परराष्ट्रमन्त्री उपेन्द्र यादवसमक्ष दक्षिण अप्रिकामा नेपाली राजदूतावास स्थापना गर्न आग्रह गर्नुभएको छ।स्रोतका अनुसार मन्त्री यादव र राजदूत फेटोका बीच आइतबार परराष्ट्र मन्त्रालय नारायणहिटीमा भएको शिष्टाचार भेटघाटमा राजदूत फेटोले सो आग्रह गर्नुभएको हो।हाल दक्षिण अफ्रीकालगायत ५४ वटा मुलुक इजिप्टस्थित नेपाली दूतावासले हेर्दै आएको छ।त्यस्तै आइतबार नै नेपालका लागि संघीय गणतन्त्र ब्रँजिलका राजदूत मार्को एन्टोनियो डिनिज प्रान्टो र परराष्ट्रमन्त्री यादवका बीच शिष्टाचार भेटवार्ता भएको मन्त्रालयले जनाएको छ। राजदूतद्वयले शुक्रबार मात्रै राष्ट्रपतिसमक्षँ आफ्नो ओहदाको प्रमाणपत्र बुझाउनुभएको थियो।

कतारमा १० नेपालीको मृत्यु एक महिनामा

लिम्वूवान डट व्लगस्पोट डटकम,काठमाडौं
जनवरी महिनामा कतारमा १० नेपालीको मृत्यु भएको नेपाली दूतावासको तथ्याङ्कले देखाएको छ ।
दूतावासले उपलब्ध गराएको तथ्याङ्कअनुसार गत ५ जनवरीमा एक सडक दुर्घटनामा मोहम्मद आलमको मृत्यु भएको थियो भने त्यसको भोलिपल्ट कमल पुनको उचाईबाट खसेर मृत्यु भयो । ६ जनवरीमा धनबहादुर मानन्धरको मृत्यु भएको दूतावासले जनाएको छ । ७ जनवरीमा अजय तामाङ, ९ जनवरीमा तुलाराम रिखाम मगर, १२ जनवरीमा रामचन्द्र महतो र १३ जनवरीमा सूर्यबहादुर राईको हृदयाघातबाट मृत्यु भयो । १५ जनवरीमा प्रेम थापा र रुद्रबहादुर घिमिरेले सडक दुर्घटनामा ज्यान गुमाए भने १६ जनवरीमा रामनाथ यादवको हृदयाघातबाट मृत्यु भयो । असामयिकरुपमा ज्यान गुमाउने यी सवै नेपाली युवा स्थानीय कम्पनीहरूमा कार्यरत थिए । बर्सेनि विभिन्न कारणले कतारमा कार्यरत नेपालीहरुको अकालमा मृत्यु हुने दर बढिरहेको नेपाली राजदूतावास कतारको तथ्याङ्कले जनाएको छ ।

नेपाललाई टुक्र्याउन भारत लागिपरेको छ - मोहन वैद्य

लिम्वूवान डट व्लगस्पोट डटकम,काठमाडौं
एकीकृत माओवादीका वरिष्ठ नेता तथा संगठन विभाग प्रमुख मोहन वैद्य किरणले नेपाललाई टुक्र्याउन भारत लागिपरेको बताएका छन् । राजधानीमा आइतबार आयोजित कार्यक्रममा उनले मधेसलाई नेपालबाट अलग्याउने षडयन्त्र भारतले गरिरहेको आरोप लगाए 'खुलेरै भन्छु, भारत नेपाललाई टुक्र्याउने अभियानमा देखिएको छ,' उनले पत्रकारमाझ भने । माओवादीले विगतमा उठाएका जातीय आत्मनिर्णयको अधिकारसम्बन्धी नारालाई सामन्ती तथा औपनिवेशिक शक्तिहरूले देश टुक्र्याउने हतियार बनाएको उनको भनाइ छ । 'हाम्रै नारा उपयोग गरेर मधेसलाई नेपालबाट अलग गर्ने षडयन्त्रमा सामन्ती उपनिवेशवादी र वैदेशिक प्रतिक्रियावादी लागेका छन्,' नेता किरणले भने, 'वैदेशिक प्रतिक्रियावादीका षडयन्त्रलाई असफल पार्न हामी लड्छौं ।' पार्टीले मधेसका मामिलामा बनाएको रणनीति असफल भएको उल्लेख गर्दै उनले मधेस मामिलामा पार्टीले छलफल गरिरएको र अध्यक्ष प्रचण्डले सचिवालयमा त्यससम्बन्धी प्रस्ताव ल्याउने जानकारी दिए ।सेना र सरकारबीच हाल भइरहेको विवादलाई उनले सेनाका केही व्यक्ति र सरकारबीचको विवादका रूपमा चित्रण गरेका थिए । 'पूरै सेनाले सरकारको निर्देशन मान्दिन भनेको छैन, केही व्यक्तिले वक्तव्य निकालेका हुन्, यसलाई उछालेर बाहिरबाट रमाइलो हेर्ने कोसिस भइरहेको छ,' उनले भने । सरकार साझेदार एमाले, फोरम र सद्भावनालाई सरकारमा बसेर प्रतिपक्षको कुरा बोल्ने अपसंस्कृतिको बाहक बताए । प्रधानमन्त्री पुष्पकमल दाहाल प्रचण्डले आफू प्रधानमन्त्री कि विद्रोही नेता हो बुझ्न नसकेको अभिव्यक्तिलाई भने उनले सही बताएका थिए । 'उहाँले भन्नुभएको ठीक हो, प्रचण्ड प्रधानमन्त्री र विद्रोही नेता दुवै हुनुहुन्छ,' उनको भनाइ थियो । नेता किरणले अहिलेको लोकतन्त्र संसदीय व्यवस्था भएकाले माओवादीले त्यसलाई नमान्ने र जनगणतन्त्रमा जानेसमेत दाबी गरे । 'यो लोकतन्त्रले जनताका समस्याको सम्बोधन गर्न सक्दैन त्यसैले हामी जनगणतन्त्रमा जान्छौं,' उनको भनाइ थियो । जनगणतन्त्रमा दलीय प्रतिस्पर्धा हुने भए पनि सामन्तवाद र साम्राज्यवादको पृष्ठपोषक नेपाली कांग्रेसजस्ता पार्टी नरहने उनले बताए ।

अस्ट्रेलियामा अध्ययन गर्न जाने बाटो साँघुरियो

लिम्वूवान डट व्लगस्पोट डटकम,काठमाडौं
अस्ट्रेलियामा अध्ययन गर्न जाने विद्यार्थीका लागि बाटो थप साँघुरिएको छ । नेपाली विद्यार्थीले अध्ययनको भिसा आवेदन गर्दा अस्ट्रेलियाले अब दुईवटा बैंकका कागजातलाई मात्र मान्यता दिने भएको छ । यसअघि करिब दुई दर्जन वाणिज्य बैंकका कागजात स्वीकार्य हुने गरेकोमा सोमबारदेखि दुईवटाको मात्र स्वीकार गरिने नयाँदिल्लीस्थित अस्ट्रेलियन हाइकमिसनले जनाएको छ । दुई 'भाग्यमानी' बैंकमा नबिल र नेपाल एसबिआई छन् । हाइकमिसनको यो निर्णयले शैक्षिक परामर्श व्यवसायी र विद्यार्थी चिन्तित बनेका छन् । अस्ट्रेलिया अहिले सबैभन्दा बढी नेपाली विद्यार्थीको गन्तव्य हो ।हाइकमिसनले दुईवटा बैंकलाई छनोट गरे पनि कुनै आधार भने देखाएको छैन । यसको आधिकारिक वेबसाइटमा भनिएको छ, 'अस्ट्रेलियामा विद्यार्थी भिसाका लागि स्वीकार्य वित्तीय संस्थाहरूको सूची पुनरावलोकनपछि क्यानबरास्थित अध्यागमन तथा नागरिकता प्रधान कार्यालयले सूचीमा परिमार्जन गरेको छ ।'हाइकमिसनले २ फेब्रुअरीसम्म जुनसकै बैंकबाट आएका कागजपत्र पनि स्विकार्ने जनाएको छ । तर, त्यसभन्दा पछि आएका आवेदनमा अन्य बैंकका कागजात संलग्न रहेको खण्डमा विद्यार्थीलाई सूचित गरेर फेरि आवेदन गर्न लगाइने पनि कमिसनले वेबसाइटमा उल्लेख गरेको छ । नेपालमा क वर्गका २४ बैंक छन् । यीमध्ये अधिकांशले विद्यार्थीलाई विदेश अध्ययनका लागि ऋण उपलब्ध गराउँदै आएका थिए ।अस्ट्रेलियाको नयाँ निर्णयले विद्यार्थीलाई अप्ठ्यारो पार्ने भन्दै व्यवसायीले चिन्ता व्यक्त गरेका छन् । शैक्षिक परामर्श केन्द्रका महासचिव राजेन्द्र बरालले दुईवटा बैंकलाई मात्र मान्यता दिइँदा नेपाली विद्यार्थीले दुःख पाउने बताए । 'कुनै मापदण्ड तोकेर ९/१० वटा बैंकलाई मान्यता दिएको भए हुन्थ्यो,' उनले भने, 'राजधानीबाहिरका सहरबाट समेत विद्यार्थीले सुविधा लिएका थिए, अब अप्ठ्यारो पर्छ ।' अस्ट्रेलिया जाने प्रत्येक विद्यार्थीले औसत तीस लाख बैंक ऋण लिने गरेका छन् ।

बुसमाथि जुत्ताको झटारो प्रतिमालाई इराकी प्रहरीले भत्कायो

लिम्वूवान डट व्लगस्पोट डटकम,काठमाडौं

बग्दाद/ पूर्वअमेरिकी राष्ट्रपति जर्ज डब्लु बुसमाथि जुत्ताको झटारो हान्ने इराकी पत्रकार मुन्तादार अल जैदीको सम्मानमा राखिएको एक प्रतिमालाई इराकी प्रहरीले टुक्रा-टुक्रा पारी भत्काएको छ । सद्दाम हुसेनको गृहनगर टिक्रिटको एक अनाथालयमा रहेको सोफाजत्रै आकृतिको जुत्तालाई प्रहरीले भत्काएको हो । तामाको जस्तो रङ भएको उक्त प्रतिमाका अवशेषहरू आइतबारदेखि स्थानीय केटाकेटीको खेलौना बन्न पुगेको छ । यस प्रतिमालाई गत हप्ता अनावरण गरिएको थियो ।इराकी सरकारद्वारा सञ्चालित अनाथालयमा राजनीतिक पूर्वाग्रह रहने चीजवस्तु रहन नहुने तर्क अघि सार्दै प्रहरीले त्यसलाई हटाउनुपर्ने माग राख्दै आएको थियो । गत वर्ष डिसेम्बर १४ मा बग्दादमा एउटा पत्रकार-सम्मेलन भइरहँदा जैदीले बुसमाथि जुत्ता बर्साएका थिए ।