अधिकार उल्लंघनका उजुरी पर्ने क्रम घट्दो

लिम्वूवान डट व्लगस्पोट डटकम,काठमाडौं
राष्ट्रिय मानवअधिकार आयोगले गत वर्षको तुलनामा यो वर्षको सुरुको चार महिनामा आयोगमा मानवअधिकार उल्लङ्घनका उजुरी पर्ने क्रम घटेको जनाएको छ । यो वर्ष वैशाखमा १२१, जेठमा ९६ वटा र असारमा ९० वटा र साउनमा ६५ वटामात्र उजुरी आयोगमा दर्ता भएको बताउँदै आयोगका प्रवक्ता गौरी प्रधानले गत वर्ष असारमा १६३ र साउनमा १६२ वटा उजुरी दर्ता भएको जानकारी दिनुभएको छ ।साउन महिना सबैभन्दा बढी अर्थात १३ वटा उजुरीहरू पश्चिमाञ्चल क्षेत्रीय कार्यालयमा दर्ता भएको थियो भने केन्द्रीय कार्यालयमा १२, पूर्वाञ्चल र मध्यपश्चिमाञ्चल कार्यालयमा १०/१०, सुदूरपश्चिमाञ्चल कार्यालयमा दुइवटा मात्र उजुरी दर्ता भएका थिए । यसैगरी जनकपुर सम्पर्क कार्यालयमा पाँच, बुटवलमा ११ र जुम्लामा दुइवटा उजुरी दर्ता भएको थियो भने खोटाङमा गत महिना कुनै उजुरी दर्ता नभएको प्रवक्ता प्रधानले बताउनुभयो । विषयगत आधारमा गत साउनमा सबैभन्दा बढी अर्थात् १० वटा उजुरी दुर्व्यवहारसम्बन्धी परेका छन् । त्यस्तो दुर्व्यवहारगर्नेमा राजनीतिक दलका भातृसङ्गठन खासगरी युथफोर्स अग्रपंक्तिमा रहेको आयोगले जनाएको छ ।गत महिनामा युथफोर्सबाट छ, वाइसीएलबाट दुइ र सरकारी कर्मचारीबाट एक र अन्यबाट एक घटना भएका छन् । द्वन्द्वकालमा सुरक्षाकर्मीबाट भएकाहत्यासम्बन्धी तीनवटा उजुरी दर्ता भएका छन् । यसैगरी द्वन्द्वकालमै सुरक्षाकर्मीले बेपत्ता पारेकोसम्बन्धी एक उजुरी दर्ता भएको छ । माओवादी कार्यकर्ताहरूले अपहरण गरेको भन्ने सम्बन्धी तीन उजुरी र सुरक्षाकर्मीले बेपत्ता पारेकोसम्बन्धी एक समेत गरी चारवटा उजुरी आयोगमा दर्ता भएको बताइएको छ ।आयोगका प्रवक्ता प्रधानले द्वन्द्वोत्तर कालमा तीव्र राजनीतिक रूपान्तरण तथा राज्य र गैरराज्य पक्षबाट हुने मानवअधिकार उल्लङ्घन र ज्यादतीका घटना न्यून हुँदै गएकाले आयोगमा उजुरी दर्ताको क्रम घटेको बताउनुभयो । उजुरीको दर्ता क्रमलाई नियाल्दा बदलिंदो राजनीतिक पृष्ठभूमिमा शान्तिसुरक्षा र मानवअधिकार अवस्थामा केही सुधार आएको अनुभव गर्न सकिने अवस्था रहको प्रवक्ता प्रधानले बताउनुभयो ।