एमाले केन्द्रीय कमिटीको बैठकले प्रमुख नेताबारे टुङ्गो लगाउने

लिम्वूवान डट व्लगस्पोट डटकम,काठमाडौं,
संविधानसभा चुनावबाट तेश्रो ठूलो दल बनेको एमाले केन्द्रीय कमिटीको बैठकले प्रमुख नेताबारे टुङ्गो लगाउने भएको छ । पार्टी महासचिव माधवकुमार नेपालले पदबाट राजीनामा दिएपछि कार्यबाहक महासचिव भएका अमृतकुमार बोहोराको ठाउँमा जेठ २ गते हुनलागेको बैठकले स्थायी समिति सदस्य झलनाथ खनाललाई ल्याउने सम्भावना रहेको एमाले श्रोतले बतायो । छिटै पार्टीको महाधिवेशन गर्नलागेको एमालेको प्रमुख पदको नाम के रहनेबारे पनि बैठकले टुङ्गो लगाउनेछ । दुई सातादेखि जारी एमाले बैठकमा महाधिवेशन आयोजक समिति बन्नुपर्ने तथा प्रमुख नेताको पद संयोजक रहनुपर्ने माग उठेको छ ।
प्रमुख नेताबारे निर्णय गर्न बैशाख ३१ गते एमाले स्थायी समिति सदस्यहरुको अनौपचारिक छलफल भएको थियो । छलफलमा अनुपस्थित स्थायी समिति सदस्य बिष्णु पौडेलका अनुसार, छलफलमा स्थायी समिति सदस्य झलनाथ खनाललाई केन्द्रीय कमिटीको बैठकमा संयोजकका रुपमा प्रस्तुत गर्ने बिचार धेरै स्थायी समिति सदस्यहरुले राखेका छन् । स्थायी समिति सदस्य केपी ओलीले भने खनाललाई संयोजक बनाउन नहुने तर्क राखेको श्रोतहरुले बताएका छन् ।