झलनाथ खनाललाई एमाले महासचिवमा नियुक्त

लिम्वूवान डट व्लगस्पोट डटकम,काठमाडौं,

दुई हप्तादेखि चलिरहेको एमाले केन्द्रीय कमिटीको बैठकले झलनाथ खनाललाई महासचिव नियुक्त गरेको छ। झलनाथ खनाल नेकपा एमालेको महासचिव नियुक्त भएका छन्। एमाले केन्द्रीय कमिटीको बैठकले जेठ २ गते झलनाथ खनाललाई महासचिव नियुक्त गरेको हो। महासचिवबाट भरखरै राजिनामा दिएका माधव कुमार नेपालले बैशाख ३१ गतेको बैठकमा खनाललाई महासचिव बनाउन प्रस्ताव गरेका थिए। नेतृत्त्वमा खनाललाई ल्याउने प्रस्तावको स्थायी समिति सदस्य के.पी. ओलीले विरोध गरेका थिए। एकै व्यक्तिलाई पार्टी तथा संसदीय दलको प्रमुख बनाउन नहुने तर्क अघि सार्दै ओलीले विरोध गरेपछि पूर्व महासचिव नेपाललाई विवाद मिलाउन बैठकले तोकेको थियो। २००९ सालमा इलाममा जन्मेका झलनाथ खनाल २०३९ देखि २०४६ सम्म तत्कालिन नेकपा मालेको महासचिव थिए। नेकपा एमालेको स्थापना कालदेखि उनी स्थायी कमिटी सदस्य रहँदै आएका छन्। महासचिव खनाललाई आगामी मंसीरमा पार्टीको महाधिवेशन गराउने जिम्मेवारी केन्द्रीय कमिटी बैठकले दिएको छ।