'भीसी फोर्स' को ज्यादतीले युवाहरू विस्थापित

लिम्वूवान डट व्लगस्पोट डटकम,विप्लव भट्टराई
इलाम, फागुन १० पश्चिमी बाझोस्थित माङसेवुङमा रहेको किरात धर्मस्थलमा 'भीसी फोर्स' को ज्यादतीले युवाहरू विस्थापित हुन थालेका छन् । मानव अधिकार मञ्च इलामले शुक्रबार प्रतिवेदन सार्वजनिक गर्दै एक सयको हाराहारीमा युवाहरू विस्थापित भएको बताएको छ । धर्मगुरु आत्मानन्द लिङदेनको आश्रम सुरक्षार्थ भन्दै गत कात्तिकमा गठित भीसी -भिलेज सेन्ट्री) दस्ताको ज्यादतीले उनीहरूले गाउ छोडेको मानव अधिकारकर्मीहरूले जनाएका छन् । प्रतिवेदन सार्वजनिक गर्दै मञ्चका अध्यक्ष डीएन पराजुलीले विस्थापितलाई तत्काल स्थापित गराउनुपर्ने बताए । 'विस्थापितहरूको अवस्था दयनीय छ,' अध्यक्ष पराजुलीले भने- 'समस्या समाधानका लागि सरकार गम्भीर हुनुपर्छ ।' त्यस अवसरमा प्रमुख जिल्ला अधिकारी रामप्रसाद घिमिरेले त्यहाको समस्या समाधानका लागि पहल भइरहेको बताए । 'त्यहाका समस्याबारेमा प्रशासनलाई जानकारी आएको छ,' प्रजिअ घिमिरेले भने- 'समाधानका लागि चाडै कदम चाल्नेछौं ।'
कार्यक्रममा सहभागी राजनीतिक दलका प्रतिनिधिहरूले समस्याप्रति राज्य उदासीन भएको भन्दै समयमै समस्या निदान नगरिए गम्भीर अवस्था आउन सक्ने चेतावनी दिए । 'राज्यले नै पृष्ठपोषण गरेकाले माङसेवुङमा अराजक गतिविधि बढेको हो,' माओवादीका जिल्ला इन्चार्ज रमणले भने । राजनीतिक स्वार्थका कारण पनि राज्यले त्यहाको समस्या समाधान गर्न नसकेको कांग्रेसका होम दुलालले बताए ।
विकृति र विसंगति हटाउने नाममा शारीरिक र मानसिक यातना दिएर युवाहरूलाई विस्थापित गराइएको प्रतिवेदनमा उल्लेख छ । भीसी फोर्सले आगन्तुकलाई चेक जाच गर्ने, रातको समयमा कफर्यु लगाउनेलगायतका क्रियाकलाप गर्ने गरेको छ । फोर्समा तीन सयको हाराहारीमा सदस्य छन् । १०-१२ वर्षा देखि ४५ वर्षउमेर समूहकाहरू फोर्समा आवद्ध रहेको स्थानीयवासीहरू बताउछन् । माओवादी द्वन्द्वकालमा काम्राङ नामको फोर्सले यस्तै गतिविधि गर्ने गरेको थियो । जनदबाबपछि त्यो समूह निस्क्रिय भएको थियो । गत कात्तिकदेखि गतिविधि थालेको भीसी फोर्सको नेतृत्व धर्मगुरु आत्मानन्द लिङदेनका माहिला छोरा 'द बोस' ले गरेका छन् । खास नाम पारस भएका उनलाई कर्र्णोल भनेर सम्बोधन गरिने गरेको प्रतिवेदनमा छ । एक साताअघि मानव अधिकारकर्मी, सञ्चारकर्मीलगायतले माङसेवुङको स्थलगत अनुगमन गरेका थिए । जिल्लाको दक्षिण पश्चिम क्षेत्रमा रहेको माङसेवुङमा द्वन्द्वकालमा विस्थापित भएर र धार्मिक आस्थाको कारण ठूलो संख्यामा सर्वसाधारण आएका थिए । धार्मिकस्थलमा अहिले करिब १२ हजार सर्वसाधारण बस्दै आएका छन् । यता भीसी फोर्सले विकृति र विसंगति हटाउदै सकारात्मक काम मात्र गरेको माङसेवुङ मिडिया सोसाइटीका अध्यक्ष सेसेहाङ फियाकले दाबी गरे ।