प्रश्नावली फारम अधिकांश सर्वसाधारणले रित्तै फिर्ता

लिम्वूवान डट व्लगस्पोट डटकम,काठमाडौं

संविधानका लागि सुझाव संकलन गर्न नुवाकोटमा आएको सभासद्को १६ नम्बर टोलीद्वारा वितरित प्रश्नावली फारम अधिकांश सर्वसाधारणले रित्तै फिर्ता गरेका छन् । टोलीले जिल्लाको १७ स्थानमा रायसुझाव संकलन केन्द्र तोकेर ४५ हजार एक सय प्रश्नावली फारम वितरण गरेको थियो । तर, दुई हजार तीन सय ४९ वटा उत्तर भरिएका फारम मात्र बोकेर सभासद् टोली राजधानी फर्किएको छ ।नुवाकोटको सुझाव संकलन गर्न खटिएकी सभासद् रत्ना गुरुङले लेखपढ गर्न नजान्ने महिलाहरू धेरैले प्रश्नावली लगे पनि नाम लेख्नसमेत नसकेको बताइन् । सभासद्हरूका अनुसार लिखु, छहरेबजार, रानीपौवा, चाउथे, मदानपुर, रातमाटे, बागेश्वरी र भाल्चेमा वितरण भएका करिब १५ हजार प्रश्नावलीको एउटै पनि जवाफ लेखिएर आएको छैन । वितरित एउटा फारममा ११ प्रश्नावली छन् । प्रश्नावली अत्यन्त जटिल भएकाले भर्न कठिन भएको सुझाव संकलन कार्यक्रममा सहभागी सर्वसाधारणले गुनासो गरेका थिए । फारम सबैले लगेका, तर सामान्य साक्षरका निम्ति प्रश्नावली भर्न कठिन रहेको सभासद्हरूले पनि स्विकारेका छन् । यसैगरी, सुझाव संकलनमा गाउँमा पुगेका सभासद्लाई गाउँलेले छोराछोरीलाई जागिरलगायत गाउँमा विकास माग गरेका छन् । कतिपय गाउँका किसानले आलुको मूल्य नपाएको गुनासोसमेत गरेका सभासद् जगदीश्वरनरसिंह केसीले बताए । प्रश्नावलीको उत्तरभन्दा पनि समस्या र गुनासाका पोकापन्तरा धेरै पाएको टोलीमा सहभागी अर्का सभासद् डा. प्रकाशचन्द्र लोहनीले बताए ।