सेना समायोजनका लागि जनमतसङ्ग्रह गर्नुपर्ने अवस्था आउन सक्ने

लिम्वूवान डट व्लगस्पोट डटकम,काठमाडौं

नेकपा माओवादीका नेता दीनानाथ शर्माले पूर्वसहमति र सम्झौता उल्लङ्घन गर्ने प्रयास भए सेना समायोजनका लागि जनमतसङ्ग्रह गर्नुपर्ने अवस्था आउन सक्ने बताउनुभएको छ । राजधानीमा आयोजित साक्षात्कार कार्यक्रममा उहाँले यस्तो बताउनुभएको हो ।शर्माले आफैंले गरेको प्रतिबद्धता र सहमति कार्यान्वयनका लागि आलटाल गर्न खोज्ने जुनसुकै राजनीतिक पार्टीलाई अब सचेत नेपाली जनता माफी दिन तयार छैनन् भन्नुभयो । प्रमुख प्रतिपक्ष दल नेपाली काङ्ग्रेसको मागबमोजिम माओवादीतर्फबाट संयोजक नरहेको अवस्थामा विशेष समितिमा काङ्ग्रेसको प्रतिनिधित्व हुने विश्वास उहाँले गर्नुभयो ।नेपाली काङ्ग्रेसका नेता डा. रामशरण महतले राज्यको संरक्षणमा दण्डहीनताको संस्कृति बढेको, शिविरमा रहेका हतियार तथा लडाकुको अनुगमन प्रभावकारी नभएको तथा शान्ति सम्झौता कार्यान्वयन नभएको भनी चिन्ता व्यक्त गर्दै विद्यमान अवस्थामा विशेष समितिमा काङ्ग्रेस सहभागी नहुने स्पष्ट गर्नुभयो ।नेकपा एमालेका नेता भीम रावलले प्रमुख राजनीतिक पार्टी नेपाली काङ्ग्रेसलाई पनि सो समितिमा सहभागी गराउनुपर्नेमा जोड दिंदै राष्ट्रिय हित र जनतालाई केन्द्रमा राखेर गम्भीरताका साथ सेना समायोजन प्रक्रिया अघि बढाउनुपर्ने बताउनुभयो ।