माओवादी र एमालेले दुइ पार्टीबीच सम्बन्ध सुधार गर्ने सहमति

लिम्वूवान डट व्लगस्पोट डटकम,काठमाडौं

सरकारमा सहभागी मुख्य दुइ राजनीतिक दल नेकपा माओवादी र नेकपा एमालेले दुइ पार्टीबीच सम्बन्ध सुधार र समन्वयका साथै सरकार सञ्चालन प्रक्रियालाई प्रभावकारी बनाउने उद्देश्यले एक संयुक्त समिति गठन गर्ने सहमति जनाएका छन् ।नेकपा एमाले संसदीय दलको कार्यालयमा बसेको बैठकले यस्तो सहमति जनाएको हो । समितिमा नेकपा माओवादीका तर्फबाट मोहन वैद्य 'किरण' र नेकपा एमालेबाट पूर्वमहासचिव माधवकुमार नेपाल संयोजक रहनुभएको माओवादीका प्रवक्ता एवं सूचना तथा सञ्चारमन्त्री कृष्णबहादुर महराले बताउनुभयो ।समितिका सदस्यमा माओवादीका डा. बाबुराम भट्टर्राई, कृष्णबहादुर महरा, देव गुरुङ, वर्षमान पुन र दीनानाथ शर्मा तथा एमालेका भरतमोहन अधिकारी, वामदेव गौतम, केपी शर्मा ओली, भीमबहादुर रावल र विद्यादेवी भण्डारी हुनुहुन्छ । समितिले सरकार सञ्चालनका क्रममा दुइ पार्टीबीच आपसी समझदारी विकास गर्ने तथा विभिन्न ठाउँमा भएका झडपलाई नियन्त्रण गरी त्यसअनुसारको सहमतिको सन्देश पुर्‍याउने मन्त्री महराले बताउनुभयो । समितिको पहिलो बैठकले नेपाली काङ्ग्रेसलाई माओवादी लडाकु समायोजन विशेष समितिमा ल्याउन दुवैतर्फबाट पहल गर्ने निर्णय गरेको जनाइएको छ ।यसैगरी धादिङ र ताप्लेजुङमा दुइ पार्टीका कार्यकर्ताबीच भएको झडपबारे छानबिन गर्न दुइ छुट्टाछुटटै समितिसमेत गठन गरेको छ ।