विश्व बैङ्कले तीनवटा परियोजना कार्यान्वयनका लागि सहयोग उपलब्ध

लिम्वूवान डट व्लगस्पोट डटकम,काठमाडौं

विश्व बैङ्कले तीनवटा परियोजना कार्यान्वयनका लागि नेपाललाई एक अर्ब ४९ करोड ६० लाख रुपैयाँ अनुदान र एक अर्ब ३३ करोड ८० लाख रुपैयाँ सहुलियतपूर्ण ऋण गरी जम्मा दुइ अर्ब ८३ करोड ४० लाख रुपैयाँ सहयोग उपलब्ध गराउने भएको छ ।ती तीन परियोजनाका लागि नेपाल सरकार र विश्व बैङ्कबीच तीनवटा छुट्टाछुट्टै सम्झौता भएका छन् । पहिलो सम्झौताअन्तर्गत बैङ्कले सामाजिक सुरक्षा सञ्जाल परियोजनाका लागि करिब एक अर्ब १० करोड २० लाख रुपैयाँ अनुदान र २१ करोड १० लाख रुपैयाँ सहुलियतपूर्ण ऋण सहयोग प्रदान गर्नेछ । परियोजनाको उद्देश्य खाद्यान्न अपर्याप्त भएका जिल्लाहरूमा छोटो अवधिमा विपन्न परिवारका लागि खाद्यान्न र आधारभूत आवश्यकताको पहुँच बढाउनु रहेको छ । परियोजनामा खाद्यान्नका लागि काम, दुर्गम क्षेत्रमा बीउबिजनको प्रयोगमा सहयोगजस्ता कार्यक्रम समावेश छन् ।बैङ्कले दोस्रो सम्झौताअन्तर्गत सिँचाइ तथा जलस्रोत व्यवस्थापन आयोजनामा अतिरिक्त लगानीका लागि एक अर्ब १२ करोड ७० लाख रुपैयाँ सहुलियतपूर्ण ऋण उपलब्ध गराउनेछ । आयोजनाको उद्देश्य सिँचाइसहितको कृषि उत्पादकत्व बढाउनु, छनोट गरिएका सिँचाइ कार्यक्रमहरूको व्यवस्थापन गर्नु र सिञ्चित जलस्रोत व्यवस्थापनका लागि क्षमता अभिवृद्धि गर्नु रहेको छ । आयोजनामा सानास्तरका र आधुनिक सिँचाइ प्रविधि, उन्नत बीउ र माटो व्यवस्थापनको स्थानीय उत्पादनजस्ता कार्यक्रम रहेका छन् ।त्यसैगरी बैङ्कले तेस्रो सम्झौताअन्तर्गत खाद्यान्न मूल्य सङ्कट सम्बोधन कार्यक्रमका लागि ३९ करोड ४० लाख रुपैयाँ अनुदान सहयोग उपलब्ध गराउनेछ । सो परियोजनाका उद्देश्य र यसमा समाविष्ट कार्यक्रमहरू सामाजिक सुरक्षा सञ्जाल परियोजनाजस्तै छन् ।ती सम्झौतामा आइतबार अर्थ मन्त्रालयमा अर्थसचिव रामेश्वरप्रसाद खनाल र विश्व बैङ्कका देशीय निर्देशक सुसान जी गोल्डमार्कले हस्ताक्षर गर्नुभयो ।