मुसा भगाउन घरपालुवा सेतो मुसाको प्रयोग

लिम्वूवान डट व्लगस्पोट डटकम,काठमाडौं

कार्यालयका कागजपत्र मुसाले खाएर चौपट पारेपछि भारतको हरियाणा प्रान्तका प्रहरीले कागजपत्र खाने मुसा भगाउन घरपालुवा सेता मुसालाई प्रयोग गरेको छ । भारतमा मुसाले अन्न खाएर तथा कार्यालयका महत्त्वपूर्ण कागजपत्र खाएर विभिन्न रेकर्डहरू नष्ट गर्ने ठूलो समस्या नै बनेको छ । मुसा भगाउन घरपालुवा सेतो मुसा प्रयोगले अहिले पशुविज्ञको ध्यान खिचेको छ । मुसाको समस्यासँग जुध्न थुप्रै आधुनिक प्रविधिहरू भए तापनि हरियाणाका प्रहरीले कार्यालयका औपचारिक कागजपत्र तथा प्रमाणहरू खाने मुसा धपाउने समाधान निकाल्न सकेको थिएन । कारनालको केन्द्रीय जिल्लामा त यसको समस्या विकराल छ । अदालतका कैयौं प्रमाण लेखिएका कागजपत्र मुसाले खाइदिएको छ । 'मुसाले प्रमाण कोठा नै कब्जा गरेका छन् । तर, हामी निरीह बनेका छौँ,' कारनालका सुपरीवेक्षक आर्सिन्दरसिंह चावला भन्छन् । 'यी मुसाहरू निकै हन्तकाली हुन्छन् । उनीहरू कागजपत्रदेखि दिएर कपडा र जुटका बोरासमेत चपाउँछन् । जुटका बोरामा अपराधीबाट जफत गरिएका लागूपर्दाथ, गैरकानुनी रक्सी, हातहतियार हामीले प्रमाणका रूपमा भण्डार गरेका हुन्छौँ । तर, मुसाले सबै खाएर प्रमाण चौपट पारिदिन्छ,' उनी भन्छन् । तर, अहिले यो समस्याको समाधान गर्ने हरियाणा प्रहरीले मुसाकै अर्का प्रजाति सेतो घरपालुवा मुसा प्रयोग गरेको छ । एक व्यक्तिले करिब एक महिनाअगाडि प्रहरीलाई मुसा भगाउन घरपालुवा सेतो मुसा प्रयोग गर्ने सल्लाह दिएका हुन् । कारनाल प्रहरीले ल्याबरोटरीबाट दुई सेता मुसा दुई सय रुपैयाँमा किनेको छ । 'सेतो मुसाले त गजबैको काम गरेको छ । प्रत्येक रात सेतो मुसालाई छोड्नेबित्तिकै कागजपत्र खाने मुसा त भागिहाल्छन्,' उनी भन्छन् ।