यौनशोषण गर्न खोज्ने कर्मचारीलाई प्रहरीमा बुझाए

लिम्वूवान डट व्लगस्पोट डटकम,काठमाडौं

जागिर लगाइदिने बहानामा दुई युवतीलाई यौनउत्तेजक औषधी खुवाएर यौनशोषण गर्न खोज्ने राष्ट्रिय वातावरण प्रदूषण नियन्त्रण केन्द्रका कर्मचारी सुन्दरकुमार आचार्यलाई बनेपावासी र युवतीका आफन्तले समातेर प्रहरीलाई बुझाएका छन् । पर्वत बाच्छा-५ का ४८ वर्षीय आचार्यलाई मंगलबार साँझ समातेर इलाका प्रहरी कार्यालय बनेपामा बुझाइएको हो ।उनी बनेपा-१० मा रहेको चन्डेश्वरी गेस्टहाउसनजिकैबाट पक्राउ परेका हुन् । आचार्यले काभ्रे श्यामपाटी घर भएका दुई युवतीलाई जागिरको विषयमा कुरा गर्ने भन्दै गेस्टहाउस बोलाएर यौनसम्पर्कको प्रस्ताव गरेका थिए । केही दिनअघि केन्द्रले कर्मचारी माग गरेको थियो । जागिरको खोजीमा रहेका ती युवतीले विज्ञापनमा उल्लेखित नम्बरमा फोन गर्दा आचार्यले बनेपामा पनि केन्द्रले कार्यक्रम गर्न लागेको र महिला कर्मचारी चाहिएको बताएपछि उनीहरू आचार्यको सम्पर्कमा आएका थिए । आचार्यले 'बनेपामा अफिस राखिसकेको छैन, होटलमा बसेर कुरा गरौं,' भन्दै बोलाएको ती युवतीको भनाइ उद्धृत गर्दै इप्रका बनेपाका प्रहरी निरीक्षक ऋषिकेश पाण्डेले बताए । पाण्डेका अनुसार आचार्यले उनीहरूलाई 'बिहे गरेको भए जागिर पाइँदैन, बिहे नगरेको भए आउनू' भनेर बोलाएका थिए । उनले फोनमा 'राम्रो लुगा लगाएर राम्री भएर आउनू' भनेको युवतीले प्रहरीलाई बताएका छन् । आचार्यको कुरामा शंका लागी ती युवतीले आफन्तलाई फोन गरेका थिए । युवतीहरूसँग यौनसम्पर्कको प्रस्ताव राखेपछि आचार्यलाई स्थानीय बासिन्दा र युवतीका आफन्त मिलेर पक्राउ गरी प्रहरीलाई बुझाएका हुन् । प्रहरीले आचार्यको साथबाट एउटा कन्डम र यौनउत्तेजना बढाउने 'सिल्डेनफिल क्रिएट' नामक औषधीसमेत फेला पारेको छ । यौनउत्तेजना बढाउने औषधीको आधा चक्की आचार्यले खाइसकेको प्रहरीले बताएको छ ।२० वर्षीया दुवै युवती बनेपामा क्याम्पस पढ्दै छन् । युवतीहरूलाई मंगलबार राति नै प्रहरीले आफन्तको जिम्मा लगाएर घर पठाएको छ । प्रहरीले आचार्यमाथि सार्वजनिक अपराधको मुद्दा चलाएको छ । बयानका क्रममा उनले केही 'ठूला' व्यक्तिलाई आफूले चिनेको भन्दै आरोपको प्रतिवाद गरेको इप्रक बनेपाका एक प्रहरीले बताए । आचार्यले भने आफूलाई जबर्जस्ती फसाउन खोजिएको आरोप लगाएका छन् । 'मैले केही गरेको छैन, मलाई फसाउन खोजियो,' आचार्यले नयाँ पत्रिकासँग भने । आफ्नो संस्थालाई जिल्लाका सभासद्द्वय सूर्यमान दोङ र अक्कलबहादुर थिङले बनेपामा प्रदूषण व्यवस्थापनका लागि सहयोग गर्न आग्रह गरेकाले बनेपामा कार्यक्रम गर्न लागेको उनको भनाइ छ ।