पाँच उपसमितिद्वारा संबैधानिक समितिमा प्रतिवेदन प्रस्तुत

लिम्वूवान डट व्लगस्पोट डटकम,काठमाडौं

संवैधानिक समिति अन्तर्गतका पाँचवटा उपसमितिले आइतबार आफ्नो प्रतिवेदन बुझाएका छन् ।समितिले प्रस्तावना, संकटकाल, राजनीतिक दल, संविधान संशोधन र नामबारे नयाँ संविधानमा गर्नुपर्ने व्यवस्थाको प्रस्ताव गर्न पाँचवटा उपसमिति गठन गरेको थियो ।प्रस्तावना सम्बन्धी उपसमितिले अहिलेसम्म भएका आन्दोलन प्रतिविम्वित हुनेगरी प्रस्तावना लेखिनुपर्ने सुझाव दिएको छ । उसले प्रस्तावना न्यायोचित र राजनीतिक हुनुपर्ने धारणा राखेको छ ।यस्तै संविधान संशोधन सम्बन्धी उपसमितिले महत्वपूर्ण मुद्धामा जनमत संग्रहको व्यवस्था गरिनुपर्ने भन्दै संघीय बिधायीकाको तीन तिहाइ बहुमतबाटमात्र संविधान संशोधन गर्नुपर्ने प्रस्ताव गरेको छ ।उसले मौलिक अधिकारलाई संशोधन गर्न नपाइने व्यवस्था हुनुपर्ने सुझाव दिएको छ । यसैगरी संकटकालीन अवस्था सम्बन्धी उपसमितिले संकटकाल घोषणा गर्दा लोकतन्त्र संकटमा पर्नसक्ने भन्दै त्यसतर्फ सचेत रहनुपर्ने बताएको छ ।राजनीतिक दल सम्बन्धी उपसमितिले दलहरुलाई प्रतिबन्ध लगाउन नपाइने कुरा निश्चित गरिनुपर्ने सुझाव दिएको छ ।निश्चित परिधिभित्र रहि सबैलाई दल वा संगठन खोल्ने स्वतन्त्रता हुनुपर्ने उपसमितिको प्रतिवेदनमा उल्लेख छ ।उपसमितिले दलहरुबीचको छलफल र सहमतिको आधारमा संविधानको नाम लेखिनुपर्ने सुझाव दिएको छ । राज्य र राष्ट्रको परिभाषा स्पष्ट हुनुपर्ने भन्दै राष्ट्रिय गान, राष्ट्रिय झण्डा र राष्ट्रिय प्रतिकको टुंगो लगाउनुपर्ने उपसमितिको प्रतिवेदनमा उल्लेख छ ।यसैबीच समितिका सभापति माधवकुमार नेपालले चैत्र २६ गतेभित्र सम्पूर्ण सभासद्लाई प्रतिवेदन वितरण गर्न संविधानसभा सचिवालयलाई निर्देशन दिएका छन् । समितिको आगामी ३० गते बस्ने अर्को बैठकले समन्वय उपसमिति र मस्यौदा उपसमिति गठन गर्नुपर्ने उनले बताए ।