थरूहट बन्द १० दिनदेखि जनजीवन कष्टकर

लिम्वूवान डट व्लगस्पोट डटकम,काठमाडौं

सरकारसँग भएको सहमति कार्यान्वयनको माग गर्दै संयुक्त थरूहट संघर्ष समितिले १० दिनदेखि गरेको तराईमा बन्द शुक्रबार पनि जारी रह्यो । बन्दका कारण तराईको जनजीवन कष्टकर बनेको छ । बन्दका क्रममा प्रदर्शनकारीले सडकमा टायर बालेर यातायात अवरोध गरेका छन् भने बजार खुल्न दिएका छैनन् । यातायात अवरोध हुँदा सयौं यात्रु बीच बाटोमै अलपत्र परेका छन् । यातायात अवरोध तथा बजार बन्द हुँदा दैनिक उपभोग्य समानको पनि अभाव हुन थालेको छ ।चितवनमा दैनिक उपभोग्य सामान तथा पेट्रोलियम पदार्थको अभाव भएको छ । गन्तव्यमा हिँडेका यात्रु अलपत्र परेका छन् । सौराहामा आउने पर्यटकले होटल बुकिङ रद्द गरेका छन् । बन्दका कारण सर्वसाधारणलाई सास्ती भएको भन्दै चितवनका अधिकारवादी, यातायात तथा शैक्षिकलगायतका संघसंस्थाले विज्ञप्ति निकालेर वार्ताबाट समस्या समाधान गर्न आन्दोलनकारी तथा सरकारलाई अनुरोध गरेका छन् । आन्दोलनकारी थरूहट संघर्ष समितिले भने वार्ताका लागि टोली गठन गरे पनि सरकारले बेवास्ता गरेको आरोप लगाएको छ । सघर्ष समिति चितवनका संयोजक कारी महतोले वार्तामा बस्न सरकारले बेवास्ता गरेकाले बन्द जारी रहने बताए । यसैबीच, बन्दका क्रममा थरूहटका कार्यकर्ताले ठाउँ-ठाउँमा सवारीसाधन तोडफोड गरेका छन् । नवलपरासीको तिलकपुर-५ बासमा लु३प ९८८८ नम्बरको मोटरसाइकलमा बिहीबार राति आगजनी भएको छ । रौतहटमा थरूहटका कार्यकर्ताले शुक्रबार पनि यातायात अवरोध तथा बजार खोल्न दिएनन् । तर, स्थानीय प्रशासनले राति ९ बजेबाट राजमार्ग क्षेत्रमा कफ्र्यु लगाएर यातायात सुचारु गराउँदै आएको छ । बन्दका कारण चन्द्रनिगाहपुरका एक दर्जन सरकारी कार्यालय एक सातादेखि खुलेका छैनन् । आन्दोलनकारीले ती कार्यालयमा तालाबन्दी गरेका छन् ।