लुटेराले हानेको गोली अर्का लुटेरालाई लाग्यो

लिम्वूवान डट व्लगस्पोट डटकम,काठमाडौं

भदौ २३ काठमाडौं तीनचुलेका एक व्यापारीलाई हतियार देखाएर लुट्न गएको समूहको सदस्य आफ्नै साथीले चलाएको गोली लागी घाइते भएका छन्। घाइते भएका काभ्रे जिल्ला तिमाल गाविसका २० वर्षीय अस्पुर तामाङलाई प्रहरीले तत्कालै पक्राउ गरेको छ। सोमबार अपराह्न साढे ३ बजे काठमाडौं-६ तीनचुलेका व्यापारी टासी गोल्डु लामाको घरमा प्रवेश गरी तीन जनाको समूहले लुटपाट गर्न खोजेको थियो। अस्पुरसहितको टोलीले लामालाई यार्सागुम्बा र पैसा निकाल्न धम्की दिँदै बन्दुक तेर्साएका थिए। सोही क्रममा लामाले पेस्तोल बोकेका युवकलाई धक्का दिँदा उनको हातमा रहेको पेस्तोलबाट गोली चलेको थियो। अस्पुरको दाहिने हातमा गोली लागेपछि अरु दुई युवा भागेका थिए भने गोली लागेर रगत बग्न थालेपछि अल्मलिएका अस्पुरलाई घटनास्थल नजिकै रहेको प्रहरीले पक्राउ गरेको थियो।महानगरीय प्रहरी वृत्त बौद्धका नायब उपरीक्षक गोविन्द परियारका अनुसार प्रहरी टोलीले घटनास्थलबाट दुई थान मोटरसाइकल, दुई थान मोबाइल फोन र नौ एमएमको गोलीको खोका बरामद गरेको छ। डिएसपी परियारले भने, 'स्थानीय एक क्लबका सदस्यले सहयोग गरेका कारण प्रहरीले तत्काल एकजनालाई पक्राउ गर्न सकेको हो।' फरार भएका दुईजनाको खोजी भइरहेको परियारले बताए।