मलेसियाले कामदारको तलब बढाउने अन्तिम तयारी

लिम्वूवान डट व्लगस्पोट डटकम,काठमाडौं

क्वालालम्पुर, कार्तिक ३० - मलेसियाले सबै कामदारहरुका लागि तलब बढाउने अन्तिम तयारी गरेको छ । राष्ट्रिय न्युनतम तलब’ तोक्नेबारे मस्यौदा तयार पार्न सरकारद्वारा गठित एक परामर्श समितीले यसबारे विस्तृत अध्ययन गरिरहेको र यसैबर्षको अन्त्यसम्ममा अन्तिम रुप दिई राष्ट्रिय न्युनतम तलब निर्धारण गरिने भएको मलेसियाली समाचार संस्था बर्नामाले जनाएको छ । यसैबर्ष अन्त्यसम्ममा समितीले मस्यौदा बुझाउनेमा सरकार आशावादी रहेको स्रोतलाई उध्दृत गर्दै बर्नामाले लेखेको छ । ‘समितीले यसबारे विस्तृत अध्ययन गरेर सुझाव दिएपछि निर्धारण हुनेछ’ उप मानव संशोधनमन्त्रीलाई उध्दृत गर्दै समाचारमा उल्लेख गरिएको छ । गत बिहीबार वैठकले तलब निर्धारण गर्न अन्तिम तयारी गरिरहेको र यसैबर्ष अन्त्यसम्ममा घोषणा हुने भएको जनाइएको छ । पेशागत क्षेत्र र कामको प्रकृती हेरी तलब निर्धारण गरिने बताइएको छ ।

मलेसियाली सरकारको तलबबारेको यो नीति पारित भइ लागू भएमा यहाँ कार्यरत करिब ४ लाख नेपाली कामदार लाभान्वित हुनेछन् । मलेसियमा काम गर्ने नेपालीले हाल मासिक न्युनतम ५ सय ४६ रिंगेट पाउँछन् । यहाँस्थित विभिन्न ट्रेड युनियन तथा संघसंगठनले कामदारहरुको न्युनतम तलब बढाउन र मासिक ९ सय ५० रिंगेट बनाउन दबाब दिँदैआएपछि मलेसियाले तलब निर्धारणबारे विस्तृत अध्ययन तथा परामर्श गरी मस्यौदा तयार पार्नका लागि गत सेप्टेम्बर १५ मा मजदुर युनियन, रोजगादाता संगठनका प्रतिनिधि र सरकारी तथा विभिन्न गैरसरकारी संघसंस्थाका प्रतिनिधिहरु सम्मिलित २३ सदस्यीय एक समिती गठन गरेको थियो । समितीले तलब निर्धारणबारे मस्यौदाको अन्तिम रुप दिएपछि आगामी डिसेम्बरभित्रै नयाँ न्यनुतम तलब तोक्ने तयारी भएको हो ।