बनेपामा नेपालकै पहिलो 'कन्डम घर' स्थापना

लिम्वूवान डट व्लगस्पोट डटकम,काठमाडौं
काभ्रे/ एकदेखि एक सय ५० रुपैयाँसम्मका धेरैथरि कन्डम एउटै थलोमा उपलव्ध गराउन बनेपामा 'कन्डम घर' स्थापना गरिएको छ । यसलाई नेपालकै पहिलो कन्डमको शो-रुम भएको दाबी यसका सञ्चालकले गरेका छन् । 'जिल्लाका सबै क्षेत्रका जनतामा कन्डमको पहुँच पुर्‍याउनका लागि कन्डम घर खोलेका हौं,' कन्डमघरका सञ्चालक रविराज कायस्थले भने, 'बिक्रीका साथै यससम्बन्धी जनचेतनासमेत जगाउँछौं ।' २० वर्षदेखि ४५ वर्ष उमेर समूहका महिला र पुरुषलाई लक्षित गरेर कन्डमघर स्थापना गरिएको उनले बताए । कन्डमघरमा ५० थरिका कन्डम पाइने कायस्थले जानकारी दिए । तीमध्ये महिलाका लागि प्रयोग गरिने तीनथरिका कन्डम राखिएको छ । कन्डमघर स्थापना गर्नुअघि कायस्थले एक वर्षसम्म कन्डमको खपतबारे अध्ययन गरेका थिए । उनको अध्ययनअनुसार बनेपामा एउटा पान पसलबाट मासिक चारदेखि पाँच हजार रुपैयाँको कन्डम खपत हुने गरेको छ । त्यस्तै जिल्ला स्वास्थ्य कार्यालयले आर्थिक वर्ष ०६५/६६ मा वाषिर्क दस लाख रुपैयाँबराबरको कन्डम निःशुल्क वितरण गरेको तथ्यांक पाएको उनले बताए । उनले एक वर्षदेखि कन्डमको होलसेल व्यापार गर्दै आएका छन् ।