अपहरणकारीका परिवारले नै फिरौती तिरे

लिम्वूवान डट व्लगस्पोट डटकम,काठमाडौं

सर्वसाधारणलाई अपहरण गरी फिरौती उठाउने धन्दामा संलग्न रहँदै आएका सन्दीप पाठकको परिवार नै फिरौती उठाउने समूहको पञ्जामा परेको छ । एकताका 'स्पाइडर समूह' नामक संगठन बनाएर चिकित्सक र वैदेशिक रोजगार व्यवसायीसँग फिरौती उठाएर सन्दीपले आतंक नै मच्चाएका थिए । सन्दीप अवैध हतियार बोकेको अभियोगमा एक वर्षदेखि भारतको जेलमा छन् । उनै सन्दीपका भिनाजु बाबुराम तामाङलाई ६ असोजमा कोठाबाटै अपहरण गरी अपहरणकारीले चार लाख फिरौती लिएका छन् । अपहरणकारीलाई फिरौती बुझाउन गएकी थिइन् सन्दीपकी श्रीमती । अपहरणकारीले सन्दीपकी श्रीमतीलाई फोन गरेर 'सन्दीपकी श्रीमती हुँ भनेर धाक नलगा, तेरो मान्छेलाई ठीक पारिदिउँला' भनेर धम्क्याएका थिए । अपहरण भएको १३ दिनपछि जब प्रहरीले अपहरणकारीलाई पक्राउ गर्‍यो तब रहस्य खुल्यो बाबुरामको अपहरण सन्दीपको भिनाजु भएकैले भएको रहेछ । अपहरणकारीले ६ असोज बिहान सुविधानगरस्थित घरबाटै चार/पाँचजनाले 'हामी वाइसिएल हौं तपाईसँग काम छ' भन्दै बाबुरामलाई लिएर गएका थिए । तर, उनीहरू वाइसिएल नभई अपहरणकारी थिए । उनीहरूले बाबुरामलाई घरबाट बाहिर निकालेलगत्तै कालो टेप टाँसिएको कालो चस्मा लगाइदिएर टोखा पुर्‍याएका थिए । उनीहरूले बाबुरामलाई टोखाबाट कपुरधारा चोकमा रहेको घरमा लगेर राखेका थिए । अनुसन्धान अधिकृत प्रहरी निरीक्षक राजकुमार सिलवालका अनुसार अपहरणकारीले बाबुरामको मोबाइल नम्बर ९८५१०६९२७६ प्रयोग गरी उनको परिवारसँग ९० लाख फिरौती रकम माग गरेका थिए । अपहरणकारीसँग रकमको डिल सन्दीपकी श्रीमतीले गरेकी थिइन् । उता अपहरणकारीका तर्फबाट मिलन गुरुङ भन्ने व्यक्तिले रकमको डिल गरिरहेका थिए । पीडित परिवारले आफूहरूसँग त्यत्रो रकम छैन भन्दा 'सन्दीपकी श्रीमती भएर पनि यस्तो कुरा गर्ने' भन्दै धम्क्याउने गर्थे । यसबीचमा अपहरणको बारेमा प्रहरीलाई जानकारी आइसकेको थियो । प्रहरीले अपहरणकारीलाई पक्राउ गर्ने तयारी गर्दागर्दै अपहरणकारी र पीडित परिवारबीच चार लाखका कुरा मिल्यो र पीडित परिवारले थापाथलीमा लगेर रकम बुझाए, बाबुराम रिहा भए । तर, बुझाएको रकम तीन लाख ५० हजार मात्र रहेछ । अपहरणकारीले थप ५० हजारको माग गरेपछि पीडित परिवार प्रहरीमा आए । प्रहरीले ५० हजार बुझाउन जाने क्रममा अपहरणकारीलाई पक्राउको जाल बुनेको थियो । सोही जालअनुसार १६ असोजमा अपहरणमा संलग्न चारजना पक्राउ गर्न प्रहरी सफल भयो । पक्राउ परेका अपहरणकारीमा धादिङका २४ वषर्ीय हाप्पा भनिने सूर्यबहादुर गुरुङ, कास्की रामबजारका २३ वर्षका अमित पौडेल, धादिङ दार्खाका ३० वषर्ीय कमल गुरुङ र गोर्खा आँपपीपलका २३ वषीय अनिल थापामगर छन् । अपहरणमा संलग्न पाँचजनाको पहिचान भए पनि प्रहरीले उनीहरूलाई पक्राउ भने गर्न सकेन ।