अनाथ प्रमाणित गराई क्यानडा पठाउने प्रयास

लिम्वूवान डट व्लगस्पोट डटकम,काठमाडौं

१६ भदौ सैनिक मुख्यालयमा कार्यरत मेजर कृष्णध्वज थापाले बाबुआमा भएकी १५ वर्षीया बालिकालाई अनाथ प्रमाणित गराई क्यानडा पठाउने प्रयास गरेका छन् । मेजर थापाले काठमाडौं बसुन्धराकी १५ वर्षीया सकिला लामालाई अनाथ बनाई दलालमार्फत क्यानडा पठाउने तयारी गरेका हुन् ।थापाले नयाँदिल्लीस्थित क्यानेडियन हाई कमिसनबाट 'अनाथ'का रूपमा बालिका लामाको नाममा भिसासमेत लगाइसकेका थिए । उनले बौद्ध प्रहरीबाट बालिका अनाथ रहेको नक्कली कागजात बनाएका हुन् । थापाले सकिलाका बाबुसँग बालिका अनाथ भएको नक्कली कागजात बनाएको स्विकारेका छन् ।क्यानडाली मन्त्रालयले 'तिम्री छोरी अनाथका रूपमा यसरी आउँदै छ' भन्ने पत्र दिएपछि आफू नेपाल फर्केको देवेन्द्रले बताए । छोरीलाई दलालमार्फत क्यानडा लान लागेको थाहा पाएपछि आफैं लान पाउ भन्दै उनले जिल्ला प्रशासन कार्यालय काठमाडौंमा जाहेरी दिएका छन् । लामा क्यानडा उडाउन लागिएकी छोरी सकिलालाई जुलाई १० मा नै त्रिभुवन अन्तर्राष्ट्रिय विमानस्थलबाट फर्काउन सफल भएका थिए । तर, अहिले छोरी आफैंले लैजान भने पाएका छैनन् । मेजर थापा र राष्ट्रिय अनुसन्धानका एसपी उमेश पोखरेलले लामालाई छोरी लान दिएनन्, जिल्ला प्रशासन कार्यालय फर्काइदिए । बालिकालाई ३५ दिनभित्र क्यानडा लाने सर्तमा लामा बाबुछोरी दुवैको पासपोर्ट प्रमुख जिल्ला अधिकारी भोलाप्रसाद सिवाकोटीले नियन्त्रणमा लिएको लामाले बताएका छन् । 'बाबुछोरी दुवैको टिकट काटेर आउनुस्, अनि पासपोर्ट र छोरी दिन्छौं भनेर पठाए,' लामाले नयाँ पत्रिकासँग भने । तर, टिकट काटेर आएपछि पनि प्रमुख जिल्ला अधिकारीले परराष्ट्र मन्त्रालयमार्फत बालिकाको अनाथ भिसा क्यान्सिल गराएको पत्र ल्याउन अह्राएको लामाले बताए । परराष्ट्रबाट कागजात ल्याएपछि पनि प्रजिअले छोरी नदिएको लामाले बताए । मंगलबार पनि छोरी फिर्ता नपाएपछि बाबु देवेन्द्रले सैनिक मुख्यालयमा मेजर थापाविरुद्ध बालिका बेपत्ता बनाएको भन्दै जाहेरी दर्ता गराएका छन् । छोरीलाई अनाथ हुनबाट रोक्न राष्ट्रिय मानवअधिकार आयोगमा उजुरीसमेत गरेको लामाले बताए । क्यानडामा काम गर्दै आएका लामाले गत वर्ष जेठी श्रीमती बबीसँग पारपाचुके गरेपछि क्यानडामै बस्दै आएकी छोरी सकिला आमासँगै नेपाल पठाएको बताए ।