प्रधानमन्त्री चयन अप्ठेरो मोडमा

लिम्वूवान डट व्लगस्पोट डटकम,काठमाडौं

साउन १५ - नयाँ प्रधानमन्त्रीका लागि संसद्‍मा भएको मतदानमा उम्मेदवारको पक्ष वा विपक्षमा लाग्नेभन्दा तटस्थ बस्नेहरू 'शक्तिशाली' भएपछि नयाँ सरकार गठन अप्ठेरो मोडमा पुगेर अड्केको छ। पटक-पटकका चुनावमा कुनै पनि उम्मेदवारको प्रस्तावले स्पष्ट बहुमत पाएका छैनन्। प्रधानमन्त्रीका दुईजना उम्मेदवार एकीकृत माओवादी अध्यक्ष पुष्पकमल दाहाल र कांग्रेसका रामचन्द्र पौडेलमध्ये एकले बहुमत नपाएसम्म चुनाव दोहोर्‍याइरहनुपर्ने कानुनी चक्रमा मुलुक फसेको छ। प्रधानमन्त्री चयनका लागि साउन १७ गते सोमबार अपराह्न ४ बजे तेस्रोपटक चुनाव हुँदैछ। यसअघिका दुई चुनावमा दाहाल र पौडेल दुवैको प्रस्ताव पराजित भइसकेको छ। संसद्मा प्रतिनिधित्व गर्ने २५ मध्ये २० दल तटस्थ बसेका कारण प्रधानमन्त्री चयन हुन नसकेको हो। ५ सय ९९ सदस्य रहेको व्यवस्थापिका-संसद्बाट प्रधानमन्त्री चुनिन संसद्‍मा भएको मतदानमा कम्तिमा तीन सयको समर्थन जुटाउनुपर्छ।