सभासदहरुले कोसीपीडितलाई भारतले क्षतिपूर्ति दिनुपर्नेमा जोड

लिम्वूवान डट व्लगस्पोट डटकम,काठमाडौं

कोसी कटानले नेपाली गाउँ डुबानमा पारी हजारौंको बिचल्ली बनाएकोप्रति ध्यानाकर्षण गर्दै सभासदहरुले कोसीपीडितलाई भारतले क्षतिपूर्ति दिनुपर्नेमा जोड दिएका छन् । सत्तारुढ दलका सभासदहरुले भारत सरकारबाट क्षतिपूर्ति दिलाउनका लागि सरकारसित माग गरेका छन् । उनीहरुले बाढीपीडितहरुलाई सक्दो सहयोग गर्दै पुनस्थापनाको व्यवस्था गर्न समेत माग गरेका छन् ।शुक्रबार सुरु भएको संविधानसभाको व्यवस्थापिका वैठकमा बोल्दै सभासदहरुले यस्तो माग गरेका हुन् । समासदहरुले कोसीको जस्तै घटना दोहोरिन नदिनका लागि महाकाली, गण्डकी र महली सागर लगायतका तटबन्धको सुरक्षामा ध्यान दिन र प्रतिरोधात्मक उपाय अपनाउन पनि सरकारको ध्यानाकर्षण गराएका छन् ।संसद वैठकमा विशेष समय लिएर बोल्ने माओवादी र एमाले सभासदहरुले कोसी सम्झौताको त्रुटिका कारण पूर्वी तराइका गाउँ डुबानमा परेको भन्दै भारत सरकारको हेपाहा प्रवृत्ति र पूर्वर्ती सरकारको उदासिनताका कारण कोसी तटबन्ध फुटेको औंल्याएका थिए ।माओवादी सभासद सावित्रकीकुमार काफ्ले, एमाले सभासद भीम आचार्य, जनमोर्चाका चित्रबहादुर केसी लगायत सभासदले यस्तो कुरा उठाएका हुन् । सभासद केसीले प्रधानमन्त्री भारत भ्रमणमा जाँदा कुनै पनि राष्ट्रघाती सन्धि सम्झौता नगर्न सचेत गराउनुभयो । उहाँले भारतको विस्तारवादी नीतिका अगाडि लम्पसार परेर देशविरोधी कुनै काम नगर्न ध्यानाकर्षण गराउनुभयो ।