ब्रिटेनकी एक किशोरीले माहुरीको दाह्री

लिम्वूवान डट व्लगस्पोट डटकम,काठमाडौं
सानो छँदा कसैले मकैको दाह्री-जुँगा बनाएर खेले होलान्　। कसैले डटपेनले कोरेर अनुहारमा दाह्री-जुँगा बनाए होलान्　। तर, ब्रिटेनकी एक किशोरीले माहुरीको दाह्री बनाएकी छिन्　। १६ वर्षीया नेली ओडाम-विल्सनले आफ्नो चिउँडोमा माहुरीको दाह्री बनाएकी हुन्　। उनले सुरुमा रानी-माहुरीलाई चिउँडोमा राखिन्　। त्यसपछि बिस्तारै अरू माहुरी आएर उनको चिउँडोमा बसे　। नेली डेभनस्थित हनी फार्ममा माहुरीको दाह्री बनाएकी हुन्　। माहुरीको दाह्री बनाउँदा पनि उनलाई एउटै माहुरीले टोकेन　। उनले सात मिनेटसम्म माहुरीलाई आफ्नो शरीरमा राखेकी थिइन्　। 'आफ्नै शरीरमा माहुरी राख्न सुरुमा एकदमै डर लाग्यो　। तर, यो राम्रो कारणका लागि गर्न लागिएकाले निडर भएँ,' उनी भन्छिन्　। माहुरी बसुन्जेल उनी नचली उभिइरहिन्　। अलिकति पनि हलचल गर्दा माहुरीले टोक्ने सम्भावना बढी हुन्थ्यो　। अफ्रीका जानका लागि पैसा उठाउन उनले यो जोखिम उठाएकी हुन्　। स्वयंसेवा गर्न उनी युगान्डा जान चाहन्छिन्　। यस काम गरेबापत नेलीले तीन सय ९० पाउन्ड संकलन गर्न सफल भइन्　। उनी युगान्डाको अनाथ आश्रममा स्वयंसेवा गर्ने बताउँछिन्　। 'हुन त मेरो चिउँडोमा माहुरी केवल सात मिनेटमात्र बसे　। तर, मलाई यो समय धेरै लाग्यो　। माहुरी मेरो अनुहारमा घसिँदा मलाई चिलाइरहेको थियो　। माहुरीले कतिखेर चिल्छ भनेर म सधैँ डराइरहेकी थिएँ　। तर, फार्ममै काम गर्ने भएकाले सुरक्षित हालतमै छु भनेर म ढुक्क थिएँ,' उनी भन्छिन्　।