विद्यार्थी कुटपीटमा सभासद् संलग्न रहेको आरोप

लिम्वूवान डट व्लगस्पोट डटकम,काठमाडौं
इनरुवा, पुस ५ - कप्तानगन्ज- ४ स्थित कृष्ण उच्च माविका विद्यार्थीहरुमाथि भएको कुटपीटमा फोरम लोकतान्त्रिकका सभासद मुगालाल मेहताको संलग्नता रहेको भन्दै ६ विद्यार्थी संगठनले कारबाही माग गरेका छन् । ६ विद्यार्थी संगठनले कारबाही माग गर्दै सोमबार जिल्ला प्रशासन कार्यालय सुनसरीमा ज्ञापनपत्र बुझाएका छन् । सभासद् मेहताका छोरा बेचन मेहता विद्यालय व्यवस्थापन समितिका अध्यक्ष हुन् । छोरा बेचन र सभासद् मुगालालले विद्यार्थीलाई कुटपीट गरेको ज्ञापनपत्रमा उल्लेख छ । ६ विद्यार्थी संगठनले पाँचदिन भित्र सभासद् मेहतालाई कारबाही नगरिए र मागहरु सम्बोधन नगरिए कडा आन्दोलन गर्ने चेतावनी दिएका छन् । ज्ञापन पत्र बुझ्दै सुनसरीका सहायक प्रमुख जिल्ला अधिकारी बासुदेव घिमिरेले दुई तीन दिनभित्रै समस्या समाधानका लागि पहल गर्ने आश्वासन दिए । विद्यालयमा प्रधानाध्यापक नियुक्तिको विषय लिएर गत बिहीबार विद्यार्थी र व्यवस्थापन पक्षबीच झडप हुँदा ७ जाना विद्यार्थी घाइते भएका थिए । प्रधानाध्यापक चन्द्रकान्त झाले पद स्थानन्तरण गरेर गएपछि नयाँ प्रधानाध्यापकको रुपमा गणेश मेहेता गएपछि विद्यालयमा विवाद वढेको हो ।