बेलायती राजकुमार विलियम्स र केट मिडलटनबीचको विवाह भब्य

लिम्वूवान डट व्लगस्पोट डटकम,काठमाडौं

लण्डन, वैशाख १६ - बेलायती राजकुमार विलियम्स र केट मिडलटनबीच शुक्रबार एक भव्य समारोहबीच विवाह भएको छ । राजकुमारको विवाह समारोह विश्वभरका दुई अर्बभन्दा बढीले हेरेको समाचार संस्था एपीले जनाएको छ । राजकुमार विलियम्सले आफ्नो प्रेमलाई विवाहमा रुपान्तरण गरेका हुन् । विवाह समारोहमा १ हजार ९ सयलाई बोलाइएको थियो । यसैबीच राजकुमार विलियमलाई डयुक अफ क्याम्ब्रिजको उपाधी शुक्रबार उनको विवाहको दिन प्रदान गरियो भने केट मिडल्टनलाई विवाहपछि डचेज अफ क्याम्ब्रिजको उपाधी दिइएको बेलायतको बकिङघम् राजप्रासादले जनाएको छ । आफ्ना नाती प्रिन्स अफ वेल्स राजकुमार विलियमलाई बेलायतकी महारानी एलिजावेथले ड्युकको उपाधी प्रदान गरिन् भने अब उनको उपाधीहरू ड्युक अफ क्याम्ब्रिज, अर्ल अफ स्ट्राथर्न र व्यारोन क्यारिकफर्गस हुनेछ । राजप्रासादका अनुसार अब राजकुमार विलियम अधिराजकुमार ड्युक अफ क्याम्ब्रिज हुनेछन् भने सुश्री क्याथरिन् मिडल्टन् विवाह गरेपछि अधिराजकुमारी डचेज अफ क्याम्ब्रिज हुनेछिन् । विलियमको क्ल्यारेन्स हाउसका प्रवक्ताले पनि विलियम सम्मानित भएको पुष्टी गरे ।परम्परागत रुपमा शाही दुलहाले विवाहको दिन कम्तीमा एउटा उपाधी पाउँछन् र दुलहीले सो उपाधी स्वतः ग्रहण गर्छन् । डचेज हुनुका अतिरिक्त केट मिडल्टन् भने प्रिन्सेस अफ विलियम अफ वेल्स हुने परम्परा छ । उनलाई सञ्चारमाध्यमले प्रिन्सेस क्याथरिन भन्नसक्ने भए पनि उनलाई आधिकारिक रुपमा सो नामले पुकारिदैन किनकी उनी जन्मदै राजकुमारी थिइनन् ।