रातो पासपोर्ट दुरुपयोग गरेको अभियोगमा दुई सभासद पक्राउ

लिम्वूवान डट व्लगस्पोट डटकम,काठमाडौं

वैशाख ६ - रातो पासपोर्ट (कुटनीतिक) दुरुपयोग काण्डमा मुछिएका सभासदद्वय मधेसी जनअधिकार फोरमका बीपी (बिश्वनाथप्रसाद) यादव र नेपाली जनता दलकी गायत्री शाहलाई प्रहरीले पक्राउ गरेको छ । प्रहरीले सभामुख सुभाष चन्द्र नेम्वाङलाई जानकारी दिएर पक्राउ गरेको हो । मंगलबार ब्यस्थापिका संसदको बैठक स्थगित भएपछि संसदभवनबाट बाहिरींदै गर्दा उनीहरुलाई प्रहरीले पक्राउ गरेको हो । यसअघि उनीहरुले संसद सुविधामा प्राप्त गरेको रातो पासपोर्ट दुरुपयोग गरेको आशंका भएपछि सभामुखले प्रहरीको केन्द्रीय अनुसन्धान व्यूरोलाई अनुसन्धानको लागि पठाएका थिए । अहिले दुई सभासदलाई काठमाडौँ प्रहरी परिसरमा राखिएको बताइएको छ । यादवले आफ्नो नाममा रहेको ०१९८९३ र साहको ०१९८२६ नम्बवरको रातो पासपोर्ट बोकेर अस्ट्रेलिया जानका लागि अबुधावी पुगेका दुई जना ब्यक्तीलाई त्यहाँको अध्यायगमनले फिर्ता गरेपछि अनुसन्धान सुरु भएको हो । सुरुमा परराष्ट्र मन्त्रालयले गरेको प्रारम्भिक छानविन पछि संसदलाई जानकारी गराएको थियो । संसदले यसलाई कानुन त फौजदारी कसुर ठहरिने भन्दै प्रहरीलाई छानविन गर्न पठाएको हो । प्रहरीले ति दुई जना सभासद्ले पासपोर्ट दुरुपयोग गरेको यथेष्ट प्रमाण जुटेका कारण पक्राउ गरिएको जनाएको छ ।