प्रधानन्यायाधीश खिलराज रेग्मीको नाम बिहीबार सर्वसम्मत

लिम्वूवान डट व्लगस्पोट डटकम,काठमाडौं

वैशाख १५ - संसदीय सुनुवाई विशेष समितिले प्रधानन्यायाधीश खिलराज रेग्मीको नाम बिहीबार सर्वसम्मत अनुमोदन गरेको छ । समितिमा प्रस्तावित प्रधानन्यायाधीश रेग्मीले न्यायसम्पादनमा ढिलासुस्ती हटाउन प्राथमिकता दिने प्रतिबद्धता जनाए । रेग्मीविरुद्ध संसदीय सुनुवाई विशेष समितिमा तीन उजुरी परेका थिए । आफूले तीन हजार मुद्धाको फैसला गरेको बताउँदै उनले उजुरी पर्नुको कारण सभासदलाई जानकारी दिएका थिए । संवैधानिक निकायका पदाधिकारीलाई संवैधानिक परिषद्ले सिफारिस गर्ने र त्यसमाथि संसदीय सुनुवाई गर्ने संवैधानिक व्यवस्था छ । राष्ट्रपति रामवरण यादवले प्रधानन्यायाधीश नियुक्त गरेपछि रेग्मीले बैशाख २३ गतेदेखि कार्यभार सम्हाल्नेछन् । रेग्मीले न्यायसम्पादनमा सम्झौता नगर्ने दोहोर्‍याए । 'न्याय सम्पादनमा 'कम्प्रोमाइज' हुँदैन, पदमा रहँदा निर्भिकतापूर्वक काम गर्छु,' उनले संसदीय सुनुवाई समितिको बैठकमा भने । रेग्मीले अदालतको पुनर्संरचना र आधुनिकीकरण गर्दै लैजाने योजना पनि सुनाएका थिए । प्रधानन्यायाधीश रामप्रसाद श्रेष्ठको म्याद बैशाख २२ गते सकिने भएपछि उनी अहिले विदामा छन् । श्रेष्ठमा विदामा रहेकाले रेग्मी कायममुकामय छन् ।