अर्थराज्यमन्त्रीद्वारा राजीनामा दिने घोषणा

लिम्वूवान डट व्लगस्पोट डटकम,काठमाडौं

वैशाख ८ - अर्थराज्यमन्त्री ल्हारक्याल लामाले राजीनामा दिने घोषणा गरेका छन् । उनले सरकारलाई आफूमाथि लागेका आरोप छानबिनका लागि सहयोग गर्न राजीनामा दिएको स्पष्ट पारे । सिंहदरवारमा बिहीबार अपरान्ह पत्रकार सम्मेलन गरेर लामाले आफ्नो लिखित प्रेस बक्तब्य सुनाए पनि पत्रकारसँग दोहोरो सवाल जवाफ गरेनन् । 'आफ्नो सरकारलाई छानबिनका लागि सहयोग गर्नसमेत प्रधानमन्त्रीसपक्ष राजीनामा दिने घोषणा गरेको छु,' उनले बक्तब्यमा भनेका छन् । लामालाई प्रधानमन्त्री झलनाथ खनालले चैत २८ गते अर्थराज्यमन्त्रीमा नियुक्त गरेका थिए । त्यसको दुई दिनपछि लामाले प्रधानमन्त्रीबाट शपथ लिएका थिए । उनी एमालेका समानुपातिकतर्फका सभासद् हुन् । लामाले आफूमाथि लागेका आरोप निराधार भएको प्रस्त पार्दै छानबिनको माग गरेका छन् । 'आफूमाथि लागेका आरोप कपोलकल्पित र चरित्रहत्या गर्ने खालका रहेको स्पष्ट पार्दछु,' उनले भनेका छन्, 'यस विषयमा सरकारसँग छानबिनको माग गरेको छु ।' लामाले एमाले अनुशासन आयोगले आफूमाथि लागेका आरोपबाट छानबिन गरेकोमा स्वागत गरेका छन् । 'तर संसदको राज्यव्यवस्था समितिले स्पष्ट पार्ने मौकासमेत नदिइ राजनीतिकरण गर्न खोज्यो,' उनले भने ।