खम्बुवानद्वारा प्रहरी कार्यालयमा आक्रमण / तीन प्रहरी घाइते

बेलबारी (मोरङ), वैशाख १० - पक्राउ परेका कार्यकर्तालाई छुटाउन दबाब दिंदै खम्बुवान कार्यकर्ताले शनिबार मोरङको बेलबारी प्रहरी कार्यालयमा आक्रमण गरेका छन् । खम्बुवानको आक्रमणमा तीन प्रहरी घाइते भएका छन् । घाइतेहरुको स्थानीय अस्पतालमा उपचार भइरहेको छ । खम्बुवानको आक्रमणमा प्रहरी निरीक्षक रुद्र चुँडाल, हवल्दार ज्ञानबहादुर राई र सशस्त्र प्रहरी सुजन राई घाइते भएका छन् । कार्यकर्ता छुटाउन माग गर्दै झण्डै २ सय कार्यकर्ताले प्रहरी कार्यालय तोडफोड गरेपछि प्रहरीले फायरिङ गरेको थियो । फायरिङमा झण्डै दुई दर्जन प्रदर्शनकारी पनि घाइते भएका छन् । अहिले स्थिति साम्य भइसकेको छ । इलाका प्रहरी कार्यालयमा ०६३ सालमा पनि स्थानीयवासी र सेनाबीचको झडपमा ६ स्थानीयको मृत्यु भएको थियो ।