मधेसी मोर्चाले दस हजार मधेसीलाई नेपाली सेनामा भर्ना गर्न माग

लिम्वूवान डट व्लगस्पोट डटकम,काठमाडौं

संयुक्त लोकतान्त्रिक मधेसी मोर्चाले दस हजार मधेसीलाई नेपाली सेनामा भर्ना गर्न माग गरेको छ । सिंहदरबारस्थित फोरम लोकतान्त्रिक संसदीय दलको कार्यालय सिंहदरबारमा आज दिउँसो बसेको मोर्चाको बैठकले यस्तो माग गरेको हो । नेपाली सेनालाई समावेशी बनाउनेलगायत विषयमा सरकार र मधेसी मोर्चाबीच विगतमा भएको ८ बुँदे सहमतिअनुसार मधेसी समुदायबाट दस हजार जनालाई नेपाली सेनामा भर्ना गर्नुपर्ने मोर्चाको तर्क छ । मोर्चाको बैठकले सेना समायोजन तथा पुनःस्थापनाको खाका दुई महिनाभित्र जारी गर्न दलहरुसँग माग पनि गरेको छ । मधेसी जनअधिकार फोरम गणतान्त्रिकका अध्यक्ष जयप्रकाश गुप्ताले समायोजन हुने जनसेनाको संख्या किटान हुन नसक्नु, समायोजनको मापदण्ड र संरचनाको विषयमा सहमति हुन नसक्नु पाँच बुँदे सहमतिको कमजोर पक्ष भएको बताउनुभयो । मोर्चासँग भएको सहमति विपरित नेपाली कांग्रेसले जेठ १४ गते राती पाँच बुँदे सहमतिमा हस्ताक्षर गरेपछि उप्रतिको विश्वास गुमेको बैठकले ठहरसमेत गरेको छ । मधेसी जनअधिकार फोरम लोकतान्त्रिकका अध्यक्ष विजयकुमार गच्छदारले कांग्रेसप्रतिको विश्वास गुमेको बताउनुभयो ।