संविधानसभा परिसरमा भारतीय नम्बरको गाडी

लिम्वूवान डट व्लगस्पोट डटकम,काठमाडौं
सभासद्हरूले भारतीय दूतावासले उपहार दिएका मिनीबस चढ्दा राष्ट्रियतामाथि नै 'मजाक' हुने बताइरहेका वेला मंगलबार एक सभासद् भारत बिहार राज्यको नम्बर-प्लेट भएको गाडीमा सवार भएर संविधानसभा पुगे । संसद् सचिवालयले उपलब्ध गराउने सवारी-पाससमेत नभएको सो गाडीलाई सुरक्षाकर्मीले पनि विनारोकटोक भित्र छिर्न दिए ।मधेसी जनअधिकार फोरमका सभासद् शिवपूजन यादव द्यच् ज्ञब्ए द्दण्ण्छ नम्बरको भारतीय गाडी लिएर संविधानसभा पुगेका हुन् । गाडीमा सभासद् यादवका साथी पनि थिए ।
संविधानसभापरिसरभित्र सचिवालयको अनुमतिविना भारतीय नम्बर-प्लेटको गाडी लैजान पाइन्न । नेपाली नम्बर-प्लेटका गाडीसमेत संसद् सचिवालयले उपलब्ध गराउने सवारी-पास लिएर मात्रै भित्र छिर्न पाउने प्रावधान छ । तर, सभासद् यादव चढेको गाडीलाई भने सुरक्षाकर्मीले सहज रूपमा संविधानसभापरिसर छिर्न दिए ।संविधानसभापरिसरभित्र प्रधानमन्त्री, संविधानसभाका अध्यक्ष, उपाध्यक्ष र मन्त्रीहरूले चढ्ने गाडी मात्रै विनाचेकजाँच प्रवेश गर्न पाउँछन् । गाडी भएका सभासद् र अन्य गाडीहरू प्रवेश गर्दा संविधानसभा सचिवालय वा गृह मन्त्रालयले दिएको प्रवेशपास अनिवार्य हुन्छ ।सभासद् यादव चढेको गाडीमा बाराको पथलैयाबाट लिएको नबुझिने अस्थायी नम्बर-प्लेट राखिएको थियो । संविधानसभाको मूल गेटमा खटिएका प्रहरीले उनको गाडीलाई रोक्न खोजे पनि सभासद् यादवले 'सभासद्ले गाडी ल्याउन नपाउने ?' भन्दै उल्टै थर्काएका थिए । अन्य सभासद्ले झैं आफूले पनि सामान्य रूपमा गाडी चढेर आएको सभासद् यादवले बताए । 'भन्सार तिरिएको छ । अस्थायी नम्बर-प्लेट लिएका छौँ । अनि, के चाहियो ?' उनले प्रतिप्रश्न गरे । स्रोतका अनुसार उक्त गाडी बिहार सीतामाडीका वीरेन्द्र सिंहको हो । उनले सभासद् यादवलाई उपहारस्वरूप सो गाडी दिएका हुन् । सीतामाडी सर्लाहीको मलंगवाको सीमाक्षेत्र हो । तर, सभासद् यादवले भने गाडी आफ्ना साथी रामवली यादवको भएको दाबी गरेका छन् । रामवली फोरमका महाधिवेशन प्रतिनिधि हुन् । 'मेरो गाडी हो । यहाँ घुम्न आएको,' उनले लिम्वूवान डट व्लगस्पोट डटकमसित भने ।भारतीय नम्बर-प्लेट भएको गाडी संविधानसभापरिसरमा छिर्दासमेत सुरक्षार्थ खटिएको प्रहरी भने 'लाचार' बनेको यो पहिलो घटना हो । 'भारतीय नम्बर-प्लेटको गाडी नल्याउनुपर्ने हो । सभासद्ज्यूहरू आफैंले पनि नियम पालना गर्नुपर्ने हो,' संविधानसभामा खटिएको प्रहरी टोलीका प्रमुख डिएसपी दिलीप चौधरीले भने ।सर्लाही- ६ बाट संविधानसभा सदस्यमा निर्वाचित सभासद् यादवले चुनावमा तराई-मधेस लोकतान्त्रिक पार्टीका अध्यक्ष महन्थ ठाकुर र कांग्रेसका अमरेशकुमार सिंहलाई पराजित गरेका थिए ।