कोरियाली प्रायद्वीपमा आणविक युद्ध हुनसक्ने चेतावनी

लिम्वूवान डट व्लगस्पोट डटकम,काठमाडौं

सोल/ उत्तर कोरियाले कोरियाली प्रायद्वीपमा आणविक युद्ध हुनसक्ने चेतावनी दिएको छ । राष्ट्रसंघले उत्तर कोरियाविरुद्ध कडा नाकाबन्दी लगाउने निर्णयपछि उत्तर कोरियाको यो चेतावनी आएको हो । आणविक बम-निर्माण कार्यलाई थप गति दिने प्रतिज्ञा उत्तर कोरियाले गरेको छ । उत्तर कोरियाको सरकारी साप्ताहिक पत्रिका तोनजिलले संयुक्त राज्य अमेरिकाले दक्षिण कोरिया र जापानमा प्रशस्त आणविक अस्त्र तैनाथ गरेको र ती अस्त्र आफूविरुद्ध कनै पनि बेला प्रयोग हुनसक्ने विश्लेषण छापेको छ । विश्लेषणमा भनिएको छ- उत्तर कोरिया पूर्णतः अमेरिकी आणविक हमलाको परिधिभित्र परेको छ र कोरियाली प्रायद्वीपमा आणविक युद्धको खतरा सबैभन्दा उच्च अवस्थामा पुगेको छ । शनिबार मात्रै नयाँ नाकाबन्दीअनुरूप जलक्षेत्रमा आफ्नो मुलुकको पानीजहाजलाई रोक्ने प्रयास गरे कुनै पनि मुलुकविरुद्ध युद्ध छेड्न सकिने धम्की उत्तर कोरियाको विदेश मन्त्रालयले दिएको थियो । शुक्रबार राष्ट्रसंघ सुरक्षापरिषद्ले उत्तर कोरियाविरुद्ध लगाइने नयाँ नाकाबन्दीको अनुमोदन गरेको थियो ।