सार्वजनिक स्थलबाट एचआइभी संक्रमितले पीडा सुनाए

लिम्वूवान डट व्लगस्पोट डटकम,काठमाडौं

विश्व एड्स दिवसका अवसरमा सोमबार दुई एचआइभी संक्रमितले आफ्ना पीडा सुनाइरहँदा चौतारामा उपस्थित कसैको पनि मन थामिएन । महिला, बालबालिका, युवा, वृद्ध-वृद्धा, सरकारी अधिकारी, प्रहरी, अधिकारकर्मी, पत्रकार सबै उनीहरूका पीडा सुनेर स्तब्ध मात्र भएनन् आँसु झार्न बाध्य भए । चौतारास्थित टुँडिखेलमा आयोजित सभामा एचआइभी संक्रमित तारा नेपाल र पदम लामाले बेचिनु र संक्रमित बन्नुको कहालीलाग्दो विगत सार्वजनिक गरेका थिए । संक्रमणपछि चेलिबेटी बेचबिखन र एचआइभी/एड्सविरुद्धको अभियानमा लागेका उनीहरूले चेतना जगाउन आफूहरूले सार्वजनिक स्थलबाट पीडा सुनाएको बताए । सानुसिरुवारी- ७ माइती भएकी ताराको कुभिन्डे- ६ का चोकनाथ नेपालसित ०५४ मा विवाह भएको थियो । श्रीमान् र सासूबाट बेचिएकी ३२ वषीया उनको व्यथा सुनिनसक्नुको छ । 'माडवारीकोमा राम्रो काम लगाउने भन्दै त्यसै सालको मंसिरमा श्रीमान् चोकनाथ र सासू युवकुमारी सहित ६ जनाले ५० हजार -भारु) मा बिक्री गरे,' उनले खाटा बसिसकेको घाउ कोट्याउन सुरु गरिन् । तीन वर्षसम्म नयाँ दिल्ली, मुम्बई, कलकत्तालगायतका सहरमा वेश्यावृत्ति गर्न बाध्य बनाइएकी उनले राति बत्ती गएको समयमा ०५७ माघमा भागेर नेपाल आउन सफल भएको बताइन् । 'यौनसम्पर्क राख्न नमान्दा कुटाइ खानुपथ्र्यो, वेश्यावृत्ति गर्न नमान्दा पाएको यातनाले हातका औँला चल्दैनन्,' कालो अतीत सम्भिmएर भक्कानिएको मन ताराले थाम्न नसकेपछि हातमा कन्डम र चेतनामूलक 'ब्रोसर' बोकेर एड्स दिवस मनाउन उपस्थित जनमानस स्तब्ध भयो । उनले संक्रमित भनेर समाजले हेला गरेको र माइत पनि बस्न नसकेको बताइन् । केही समय माइती नेपालको संरक्षणमा बसेकी उनी अहिले शक्ति समूहले चौतारामा खोलेको पुनस्र्थापन केन्द्रमा बसेर अभियानमा लागेकी छिन् । 'खाएको विष लाग्छ, गल्तीको सजाय पाउनुपर्छ,' अर्कैले गरेको अपराधको सजाय भोगिरहेका छन् अर्का संक्रमित पदम । सुन्दर भविष्यको कल्पना गर्दै कसेको लगनगाँठो नै अभिशाप बन्यो उनका लागि । र, उपहारमा पाए प्राणघातक रोग एड्स । 'आफन्तले संक्रमित युवतीसँग झुक्याएर बिहे गरिदिए,' चार वर्षअघि भएको बिहेको प्रसंगबाट सुरु गरे उनले आफ्ना व्यथा, 'उनीसँग यौनसम्पर्क भयो र म पनि संक्रमित भएँ । लिसंखु- ८ का पदमले भारतबाट फर्केकी युवतीसँग आफन्तले झुक्याएर विवाह गरिदिएको बताए । तारा र पदमले संक्रमितले पनि समाजमा केही गर्नसक्ने दृढता व्यक्त गरेपछि सबैका रसाएका आँखा ओभाएका थिए । 'संरक्षण राज्यले गरोस्, समाजले हेला नगरोस् संक्रमितले पनि मुलुकका लागि केही गर्न सक्छन्,' अभियानमा लागेका उनीहरूले विश्वासका साथ भने । नयाँ बन्ने कानुनमा चेलिबेटी बेचबिखन गर्ने र संक्रमितलाई हेलाहोचो गर्नेलाई दण्डित गर्ने कडा कानुनको व्यवस्था गर्न उनीहरूले मागसमेत गरेका थिए । संक्रमितद्वयले 'कन्डम लगाऔँ, एड्स भगाऔँ' भन्दै कन्डम र चेलनामूलक सामग्री वितरण गरेका थिए ।