दूतावास नै नभएको देशमा राजदूत सिफारिस

लिम्वूवान डट व्लगस्पोट डटकम,काठमाडौं

सरकारले हालसम्म दूतावास नै स्थापना नभएको क्यानडाका लागि राजदूतका रूपमा हालसम्म मुख्यसचिव रहनुभएका भोजराज घिमिरेलाई सिफारिस गरेको छ। क्यानडालगायत ब्राजिल, कुवेत र दक्षिण अफ्रीकामा दूतावास खोल्ने निर्णयभने सरकारले गत असारमा नै गरिसकेको छ। ती देशमा दूतावास खोल्नका लागि हालसम्म कुनै तयारी नभएको परराष्ट्र मन्त्रालयका एक उच्च अधिकारीले जानकारी दिए।‘ती देशमा दूतावास खोल्ने सरकारी निर्णयनुसार दरबन्दीका लागि सामान्य प्रशासन मन्त्रालयसँग र बजेटका लागि अर्थ मन्त्रालयसँग सामान्य कुराकानीबाहेक अन्य कुनै तयारी छैन’ -उनले शुक्रबार नेपाल समाचारपत्रसँग भने। सरकारले दूतावास खोल्नका लागि आर्थिक वर्ष२०६६/०६७ को बजेटमा व्यवस्था भने गरेको छ।परराष्ट्रस्रोतका अनुसार दूतावास नै स्थापना नभएको देशमा राजदूत सिफारिस गरिएको यो पहिलोपटक हो। ‘हामी अचम्ममा परेका छौं’, मन्त्रालयका ती अधिकारीले भने- यो त कहीँ नभएको जात्रा हाँडीगाउँमा भनेजस्तो भयो।’मन्त्रालयले विदेशमा दूतावास स्थापना गर्ने निर्णयछि सामान्य प्रशासन मन्त्रालयमा दरबन्दी र अर्थ मन्त्रालयमा बजेटका लागि आवश्यक कुराकानी गर्ने गर्दछ। त्यसपछि सामान्यतया मन्त्रालयबाट उपसचिवलाई दूतावास उपप्रमुखको जिम्मेवारी दिएर पठाउने प्रचलन छ। उनीसँगै आवश्यकताअनुसार अधिकृत र कर्मचारीहरू पठाउने गरिन्छ।तर यसपटक त्यस्तो रहेन। दूतावास स्थापना गर्ने निर्णयभएको एक महिना नबित्दै राजदूत सिफारिस गरिएको छ। अर्कातिर कुनै पनि देशमा राजदूत नियुक्त गर्दा मन्त्रालयकै सहसचिवलाई सिफारिस गर्ने प्रचलन छ। ‘मन्त्रालयको सामान्य मान्यतालाई समेत कुल्चेर आएको यो सरकारी निर्णयाट हामी दुःखित छौं’ -उनले भने।