तरकारी व्यवसायीले वीरगंज बजार बन्द गरे

लिम्वूवान डट व्लगस्पोट डटकम,काठमाडौं

पर्सा, साउन १६ - वीरगंज उपमहानगर पालिकाले उठाउदै आएको पिठीया करको बिरोधमा मंगलबारदेखि आ-आफ्नो व्यवसाय ठप्प पारी अनिश्चितकालीन आन्दोलन सुरु गरेका यहाँका तरकारी, फलफुल तथा माछा मासु व्यवसायीले शुक्रबार देखि अनिश्चितकालिन वीरगंज बजार बन्द गरेका छन् ।वीरगंज तरकारी तथा फलफुल व्यवसायी संघ र वीरगंज माछा मासु व्यवसायी संघले संयुक्त रुपमा वीरगंज बजार बन्दको आह्वान गरेका हुन् । दुबै संघले आफूहरु पिठिया करको बिरोधी नरहेको तर उमनपाको कार्यालयले आफूहरुलाई कुनै पनि भौतिक सुविधा नदिई चालु आर्थिक बर्ष देखि आफूहरुको सहमति र पूर्व जानकारी बिनानै पिठीया कर उठाउन सुरु गरेको आरोप लगाएका छन् । चार दिन देखि आफूहरु आन्दोलनरत रहेकोमा समस्या समाधानका लागि वीरगंज उमनपाको कार्यालय गम्भिर नभएको बताउदै उनीहरुले वीरगंज बजार बन्द गराएका हुन् । नगरको सबै हाट बजार बन्द भए पछि आम उपभोक्तालाई समस्या भएको छ । दुबै बजार दुई दिन देखि सुनसान रहेको छ । उपभोक्ताहरु हरीयो तरकारी, माछा मासु र फलफुलबाट बन्चित भएका छन् । वीरगंजमा हाल करीब आठ सय तरकारी तथा फलफुल व्यवसायी र करीब दुई सय माछा मासु व्यवसायी रहेका छन् ।