भक्तपुरमा हत्याको बिरोधमा आजपनि प्रदर्शन

लिम्वूवान डट व्लगस्पोट डटकम,काठमाडौं
असार २५ - भक्तपुरमा स्थानीयवासीको आक्रमणबाट दुई जना युवकको मृत्यु विषयलाई लिएर बिहीबार पनि भक्तपुरमा प्रदर्शन भएको छ । मृतकका आफन्त, आदर्श जनप्रेमी उच्च माविका विद्यार्थी तथा स्थानीयवासीको प्रदर्शनका कारण कोटेश्वरदेखि भक्तपुरसम्मको क्षेत्र बिहीबार पनि बिहानै देखि तनावग्रस्त बनेको छ । घटनाको बिरोधमा नयाँ ठिमी, पेप्सीकोला, कौशलटार, जडिबुटी र कोटेश्वर क्षेत्र प्रदर्शन गरिएको छ । स्थानीवासीको कुटपिटबाट मंगलबार मृत्यु हुने विद्यार्थी सविन क्षेत्री र जीवन थापाका सहपाठी, आफन्त र स्थानीयवासीले दोषीमाथि कारवाहीको माग गर्दै टायर बालेर सडक अवरुद्ध पारेका छन् । प्रदर्शनका कारण अरनिको राजमार्ग हुँदै काठमाडौं आउने तथा काठमाडौंबाट भक्तपुर जाने यातायात ठप्प भएको छ ।बच्चा अपहरणको प्रयास गरेको आशंकामा स्थानीयवासीले कुटपिट गर्दा हिजो चितवन घर भएको क्षेत्री र पाल्पाका थापाको मृत्यु भएको थियो । उनीहरु दुवै जना पेप्सीकोलामा बस्दै आएका थिए ।