अमेरिकामा ३७ हजार भूटानी शरणार्थी पुनर्स्थापित

लिम्वूवान डट व्लगस्पोट डटकम,काठमाडौं

चैत्र १२ - सन् २०११ को करिब ४ महिनामा मात्र ६ हजार ६ सय २५ भूटानी शरणार्थीलाई अमरिकामा पुनर्स्थापित गरिएको स्टेट डिपार्टमेन्टले बुधबार जनाएको छ । हालसम्म यहाँ ३७ हजार ७ सय ६० भूटानी पुनर्स्थापित भइसकेका छन् । सन् २००८ मा सुरु भएको भूटानी शरणार्थी पुनर्स्थापना अझ केहि वर्ष जारी रहने छ । सन् २००८ मा ५ हजार ३ सय २०, सन् २००९ मा १३ हजार ४ सय ५२ भूटानी शरणार्थीलाई अमेरिकाको ५० राज्यमा बसाइएको छ । अमेरिकाले ६० हजार भूटानी लगिने भनेकोमा अझ थप्ने बताएको छ । उता सन् २०१० मा विभिन्न मुलुकबाट ७३ हजार ३ सय ११ शरणार्थी अमेरिका लगिएको छ । अमेरिकी सरकारले वर्षेनि ८० हजारसम्म शरणार्थी लैजान सक्छ । कूल ७३ हजार ३ सय ११ मा १२ हजार ३ सय ६३ भूटानी शरणार्थी रहेको अमरिकाको शरणार्थी प्रवेश प्रतिवेदन, २०१० ले जनाएको छ । प्रतिवेदनअनुसार पूर्व एसियाको नजिक तथा दक्षिण एसियाबाट सबैभन्दा बढी शरणार्थी अमेरिका लगिएका छन् । पूर्व एसियाको नजिक तथा दक्षिण एसियाबाट ल्याइएका ती ३५ हजार ७ सय ८२ मध्ये नै १२ हजारभन्दा बढी भूटानी शरणार्थी हुन्। ती १२ हजारबाहेक अरु इराक, इरान आदिबाट बढी छन् । त्यसैगरी दोस्रो बढी संख्यामा पूर्वी एसियाबाट १७ हजार ७ सय १६ शरणार्थी अमेरिका गएका छन् । अफ्रिकाबाट १३ हजार ३ सय ५, ल्याटिन तथा क्यारेबियन क्षेत्रबाट ४ हजार ९ सय ८२ र मध्य-एसिया तथा युरोपबाट १ हजार ५ सय २६ शरणार्थी अमेरिका लगिएको स्टेट डिपार्टमेन्टले जनाएको छ ।