माओवादी र एमालेले काग्रेसलाई सरकारमा ल्याउन पहल गर्ने

लिम्वूवान डट व्लगस्पोट डटकम,काठमाडौं

एकीकृत नेकपा माओवादी र नेकपा एमालेवीच नेपाली काग्रेसलाई पनि सरकारमा सहभागी गराएर राष्ट्रिय सरकारको स्वरुप दिन पहल तिब्र पार्ने सहमति भएको छ । एमालेले बरिष्ठ नेता माधवकुमार नेपालको संयोजकत्वमा गठन गरेको बार्ता टोलीले आज माओवादी शिर्ष नेताहरुसँग गरेको दुई घण्टा लामो छलफलमा त्यस्तो सहमति भएको हो ।
बैठकमा संविधान निर्माण कार्यलाई तिब्रता दिने र तत्काल सेना समायोजन विशेष समितिको बैठक बोलाएर समायोजनको कार्ययोजना बनाउन उच्च स्तरको कार्यदल गठन गर्ने विषयमा पनि सहमति बनेको छ । बैठकमा पछि बरिष्ठ नेता नेपालले नेपाली काग्रेसलाई सरकारमा सहभागित गराउन सात बुँदे सहमतिको स्थानमा नयाँ सम्झौता हुने र त्यस्तो अवस्थामा सात बुँदे सहमति आफै निश्क्रिय हुने विषयमा एमालेले माओवादीलाई अवगत गराएको जानकारी दिदै सोही अनुसार काग्रेसलाई सरकारमा ल्याउन पहल गर्ने विषयमा सकारात्मक कुरा भएको जानकारी दिनुभयो ।
उहाँले बैठकमा तत्काल माओवादी लडाकु रहेको शिविरमा अनुगमन कर्मचारी पठाउने र संविधान जारी हुनु अगावै सेना समायोजनको काम थालनी गर्ने विषयमा पनि सहमति भएको जानकारी दिनुभयो । माओवादी उपाध्यक्ष नारायणकाजी श्रेष्ठले भने काग्रेससँग सहकार्यकोलागी नयाँ सम्झौता हुने भए पनि सात बुँदे समझदारीको मुल मर्म र भावनामा भने परिवर्तन हुन नसक्ने प्रतिकि्रया दिनुभयो । उहाँले भन्नु भयो-काग्रेसलाई पनि मान्य हुने गरी सात बुँदे सहमतिलाई परिमार्जन गरेर अगाडि बढन सकिन्छ तर खारेज हुँदैन ।
बैठकमा एमालेले शान्ति र संविधानको निर्माणकोलागी लाग्नु पर्ने अवस्थामा सबैलाई असहमति हुने गरी गृहमन्त्रालयको अडान नथाप्न माओवादीलाई आग्रह समेत गरेको थियो । एमालेको सो बार्ता टोलीले आजै मधेसवादी दलहरुसँग पनि छलफलको प्रयास भईरहेको जनाएको छ । हिजो बार्ता टोलीले नेपाली काग्रेससँग पनि छलफल गरेको थियो ।