माओवादी अध्यक्ष प्रचण्ड अचानक सिंगापुर प्रस्थान

लिम्वूवान डट व्लगस्पोट डटकम,काठमाडौं

माओवादी अध्यक्ष पुष्पकमल दाहाल सिंगापुर प्रस्थान गरेका छन्। उनी एउटा अन्तर्राष्ट्रिय संस्थाको कार्यक्रममा सहभागी हुन गएको भए पनि एकाएक तय भएको भ्रमणलाई अर्थपूर्ण रुपमा हेरिएको छ।
एसिया प्यासिफिक फाउण्डेसनले गर्न लागेको अन्तरक्रियामा सहभागी हुन दाहाल सिंगापुर गएको उनका स्वकिय सचिव समिर दाहालले जानकारी दिए। तीन दिने भ्रमणका लागि अध्यक्ष दाहाल बुधबार सवा एक बजे सिल्क एयरको बिमानबाट एक्लै सिंगापुर गएका हुन्। यसअघिका अन्तर्राष्ट्रिय भ्रमणमा श्रीमति सिता दाहाललाई पनि साथै लैजाने गरेकोमा यो पटक उनी एक्लै सिंगापुर प्रस्थान गरेका हुन्। नेपालमा माओवादी र एमालेको गठबन्धमा सरकार बनेपछि लोकतान्त्रिक गठबन्धन कमजोर भएको ठहर गर्दै भारतले गैर कम्युनिष्ट दलहरुसँग छलफल अगाडी बढाइरहेको बेला दाहालको यो भ्रमणलाई अर्थपुर्ण रुपमा हेरिएको छ। प्राय सधै सिंगापुरमा हुने सम्मेलनमा उनले नेपालको शान्ति प्रकृया, संविधान निर्माण, लगायतका बिषयमा धारणा राख्ने बुझएको छ। उनी आयोजक संस्था एसिया प्यासिफिक फाउण्डेसनका सहअध्यक्ष समेत हुन्।
यस्तै कार्यक्रममा दक्षिण एसियाको राजनीति घटनाक्रममा बिषयमा पनि छलफल हुने बताइएको छ। दाहालले सिंगापुर बसाइका क्रममा को को संग भेट गर्ने पुर्ण विवरण नखुलाइएको भए पनि चीनिया अधिकारीसँग पनि भेटबार्ता गर्ने श्रोतले बताएको छ। यसअघि पनि सरकारका लागि जोड घटाउ चलिरहेको बेला अध्यक्ष दाहाल विदेश विभाग प्रमुख कृष्णबहादुर महरा सहित सिंगापुर गएका थिए।