केन्द्रको कामकाज ठप्प पारेर आन्दोलनमा

लिम्वूवान डट व्लगस्पोट डटकम,काठमाडौं

विभिन्न १३ सुत्रीय माग राख्दै चैत्र २ गतेदेखि चरणबद्ध आन्दोलनमा उत्रिएका विराटनगरस्थित क्षेत्रीय रक्त सञ्चार सेवाका कर्मचारीहरुले केन्द्रको कामकाज ठप्प पारेका छन् ।आफ्ना मागहरुको सुनुवाई नभएको भन्दै कर्मचारीहरुले बुधबार विहान ११ बजेदेखि मध्यान्ह १२ बजेसम्म एक घण्टा केन्द्रको सेवा ठप्प पारेका हुन् । कर्मचारीहरु कामकाज छोडेर कार्यालयको गेटमा निस्किएपछि रगत लिन, रगत समुह छुट्याउन र अन्य सेवा लिन गएका सर्वसाधारणहरुलाई समस्या भएको थियो । कर्मचारीहरुले मागहरुको सुनवाई नभए बिहीबारदेखि प्रत्येक दिन एक घण्टाले काम बन्द गर्ने समय बृद्धि गर्ने घोषणा गरेका छन् । जसबाट केही समयपछि विरामीहरुले विराटनगरमा रगत नै नपाएर मृत्युको मुखमा पुग्नुपर्ने अवस्था आउने खतरा बढेको छ । कर्मचारीहरुले कार्यालयमा स्वचालित जेनेरेटरको व्यवस्था गर्नुपर्ने, थप कर्मचारीको व्यवस्था गर्नुपर्ने, जोखिम भत्ता दिनुपर्ने, ज्यालादारीमा काम गरिरहेकालाई स्थायी गर्नुपर्ने, तलब बृद्धि गर्नुपर्नेलगायतका माग राखेका छन् ।