कांग्रेस सरकारमा आए सातबुँदे संशोधन

लिम्वूवान डट व्लगस्पोट डटकम,काठमाडौं

सत्तासाझेदार दल एमाले र माओवादीले सरकारलाई राष्ट्रिय स्वरुप प्रदान गर्न नेपाली कांग्रेस सरकारमा सहभागी हुने भए सातबुँदे सहमति संशोधन गर्ने सहमति गरेका छन्। सातबुँदेलाई आवश्यकताअनुसार परिवर्तन र संशोधन गर्न एमाले लचिलो रहँदै आएको भए पनि माओवादी कठोर रुपमा प्रस्तुत हुँदै आएको थियो। सरकारलाई राष्ट्रिय स्वरुप प्रदान गर्न एमालेले पूर्वप्रधानमन्त्री माधवकुमार नेपालको नेतृत्वमा गठन गरेको उच्चस्तरीय वार्ताटोली र माओवादी नेतृत्वबीच आइतबार भएको वार्तामा कांग्रेसलाई पनि सरकारमा सहभागी गराएर मात्रै शान्ति र संविधानलाई निष्कर्षमा पुर्याउन सकिने निष्कर्ष निकाल्दै आवश्यक परे सातबुँदे सहमतिलाई संशोधन गर्नुपर्ने सहमति भएको थियो।नेपाली कांग्रेसले सातबुँदे सहमतिको खारेजी भए मात्रै नयाँ सहमति कायम गर्न सकिन्छ भन्ने धारणा राख्दै आएको छ भने माओवादीले सातबुँदे सहमति खारेज भने हुन नसक्ने बताउँदै आएको छ। सिंहदरबारस्थित एमाले संसदीय दलको कार्यालयमा बसेको बैठकमा सेनासमायोजन विशेष समितिलाई क्रियाशील बनाउँदै शान्तिप्रक्रियाको महत्वपूर्ण काम सम्पन्न गर्ने सहमति भएको हो।