आइभोरी कोस्टमाथि ३-१ को विजय ब्राजिल

लिम्वूवान डट व्लगस्पोट डटकम,काठमाडौं

आइभोरी कोस्टमाथि ३-१ को विजय हात पार्दै ब्राजिलले ६ अंक जोडेर एक खेल खेल्न बाँकी छँदै दोस्रो चरणको बाटो सहज बनाएको छ। ब्राजिलका तर्फबाट फाबियानोले २ गोल गरे भने इलानोले १। आइभोरी कोस्टका लागि ड्रोग्बाले सान्त्वना गोल ७९ औँ मिनेटमा गरे।
गोलपछि खेल अनावश्यक रुपमा फेयर प्लेको मर्मविपरीत तानिएपछि ब्राजिलियन स्टार काका दुई पहेँलो कार्डका साथ रातो कार्ड पाएर मैदानबाट बाहिरिए। खेल जिते पनि ब्राजिललाई काकाको बहिर्गमन अप्रिय रहन पुग्यो। यसअघि जर्मन स्ट्राइकर मिरोस्लाभ क्लोसले पनि पछिल्लो खेलमा रातो कार्ड पाइसकेका छन्। काकाले पाएको पहिलो पहेँलो कार्डमा विवाद नभए पनि दोस्रो पहेँलो कार्ड भने विवादमा तानियो। फ्रान्सेली रेफ्री ल्यान्योयले यही खेलमा ब्राजिलका लुइस फाबियानोले गरेको दोस्रो गोल हातले नियन्त्रणमा लिएर गरेको भए पनि मान्यता दिएका थिए।