विवाह गरेको दुई हप्ता नबित्दै बेहुलीलाई माइती फर्काइयो

लिम्वूवान डट व्लगस्पोट डटकम,काठमाडौं

खोटाङ मात्तिमकी एक महिलाको विवाह भएको दुई हप्ता बित्न नपाउँदै पुनः माइत फर्कन बाध्य हुनु परेको छ । केटा र केटी दुवै पक्षले धुमधामका साथ विवाह गरेको दुई हप्ता बित्न नपाउँदै बेहुली निरासामा घर फर्कनु परेको हो । याम्खा १ वार्लङका बेहुला १६ वर्षीय कविराज खत्रीले केटीको पहिल्यै बिहे भइसकेको हल्ला चलेपछि मात्तिम–३ माइती भएकी १६ वर्षीया ती केटीलाई माइतीलाई नै जिम्मा लगाएका हुन् । विवाह भएको दुई हप्तापछि गाउँमा केटीले यसअघि नै विवाह गरिसकेको हल्ला चलेपछि छिमेकी र परिवार बसेर केटीको माइती पक्षलाई नै जिम्मा दिइएको स्थानीय नवराज विष्टले बताएको राससले उल्लेख गरेको छ । ती केटीले एक वर्षअघि नै मात्तिमका एक युवकसँग विवाह गरेको खुलेको जनाइएको छ । सो विवाह मावली पक्षले नै चाजोपाजो मिलाई धुमधामका साथ गरिदिएका थिए ।