परीक्षा दिँदादिँदै 'रिजल्ट' जन्मियो

लिम्वूवान डट व्लगस्पोट डटकम,काठमाडौं

चैत ८ - धनकुटाको ठाकुरदेवी परीक्षा केन्द्र थलथलेबाट एसएलसी परीक्षा दिइरहेकी मिना राईले छोरा जन्माएकी छिन्। बुधबार नेपाली विषयको परीक्षा दिनको लागि परीक्षा हलमा पसेर उत्तरपुस्तिका लेख्न थाले पछि उनलाई सुत्केरी बेथाले च्यापेको थियो। परीक्षा केन्द्रका शिक्षक र अन्य साथीहरुको सहयोगमा उनलाई नजिकै रहेको आँखिसल्ला स्वास्थ्य चौकी लगिएको थिए। स्वास्थ्य चौकी पुर्‍याएको करीब २ धण्टा पछि मिनाले छोरा जन्माएको ठाकुरदेवी परीक्षा केन्द्र थलथलेका केन्द्राध्यक्ष गोपाल राईले बताए। पञ्चकृष्ण माध्यमिक विद्यालयका नियमित विद्यार्थी मिना छिन्ताङ गाविस वडा नः २ निवासी हुन्। उनको सिम्बोल नः ००७०९०० रहेको छ। जन्मिएको बच्चा र आमाको स्वास्थ्य राम्रो रहेको आँखिसल्ला स्वास्थ्य चौकीका अनमी तुलसादेवी भट्टराईले बताए। नवजात शिशुको नाम रिजल्ट राखिएको बताइएको छ।