संघीय लोकतान्त्रिक राष्ट्रिय पार्टीको प्रेस बिज्ञाप्ती

संघीय लोकतान्त्रिक राष्ट्रिय पार्टी, केन्द्रीय सचिवालयको बैठक यही मिति २०६९ साल बैशाख १९ गतेका दिन पार्टी अध्यक्ष कमल छाराहाङको अध्यक्षतामा सम्पन्न भएको छ । सो बैठकले राष्ट्रिय राजनीतिक परिस्थितिको ठोष विष्लेषण गर्दै राष्ट्रिय मुक्ति आन्दोलनलाई दिशानिर्देश गर्नका लागि निम्न बमोजिमका निर्णयहरु पारित गरेको व्यहोरा यस प्रेस विज्ञप्तिमार्फ सार्वजनिक गर्न चाहन्छौं । १. यस पार्टीबाट अर्को पार्टी पलायन भएका विभिन्न पदाधिकारी तथा विभागीय प्रमुखहरुको रिक्त स्थानमा निम्न बमोजिम पदपूर्ति गरिएको छ । 

 -१) संगठन विभाग प्रमुख : वृजमोहन चौधरी थारु 

 -२) प्रचार प्रसार विभाग प्रमुख : छिवाहाङ्ग र्राई खम्बू 

 -३) जनकल्याण विभाग प्रमुख : प्यारसिंह योञ्जन 

 -४) महिला विभाग प्रमुख : निरु गोले 

 -५) विदेश विभाग प्रमुख : समीर गुरुङ 

२. पार्टीको राजनीतिक गतिविधि नियमित र गतिशील राख्नका लागि केही राज्य परिषदको नेतृत्वमा परिवर्तन गर्नुपर्ने भएकोले तामाङसालिङ स्वायत्त राज्य परिषदको साविक संरचना विघटन गरिएको छ र राज्य अधिवेशन नभएसम्म केन्द्रीय सदस्य तथा जनकल्याण विभाग प्रमुख प्यारसिंह योञ्जनलाई संयोजकको जिम्मेवारी तोकिएको छ । 

 ३. थरुहट र तमुवानमा पार्टीको सांगठानिक क्रियाकलाप र गतिविधि बिस्तार गर्नका लागि दुवै राज्य परिषदका अध्यक्षहरु वृजमोहन थारु र खुशीमान गुरुङलाई जिम्मेवार बनाउने निर्णय गरिएको छ । 

 ४. पार्टीको संगठन बिस्तारलाई भरपर्दो र तीब्र बनाउँदै लानका लागि पार्टीको न्द्रदेखि तल्लो निकायसम्मका सम्पूर्ण संयन्त्रहरुलाई क्रमशः गाउँकेन्द्रित बनाउदै लाने निर्णय गरिएको छ । 

 ५. संविधानसभाबाट जारी हुने नेपालको भावि संविधानले संघीय लोकतान्त्रिक गणतन्त्र र जातीय ऐतिहासिक पृष्ठभूमि र पहिचान (शासकीय भूगोल सहित)को राज्य पुनःसंरचना प्रत्याभूति गरी संविधान जारी गर्नुपर्ने हाम्रो पार्टी ठहर गर्दै माग गर्दछ र सो बमोजिम नभएमा यूगान्तकारी परिवर्तन ल्याउने आन्दोलन गर्ने निर्णय गरिएको छ । 

 ६. नेपालका वर्तमान सत्ताधारीहरु प्रतिगमनकारी, यथास्थितिवादी तथा प्रतिक्रियावादी चरित्रले ओतप्रोत भई आफ्नो पार्टी र जातिगत स्वार्थ अनुकुलका प्रावधानहरुमा केन्द्रित रहेर संविधान जारी गर्ने प्रपञ्च र षड्यन्त्रमा क्रियशील रहेकाले यूगौंदेखि राजनैतिक, आर्थिक, धार्मिक, सामाजिक, लैंगिक, भाषिक तथा साँस्कृतिक उत्पीडनमा पर्दैआएका नेपालका आदिवासी, जनजाति, मधेसी, मुस्लिम, महिला लगायतका जाति, वर्ग र समुदायका अधिकार सुनिश्चितताको पक्षमा संविधान जारी हुने सम्भावना नरहेकोले राष्ट्रिय मुक्ति आन्दोलनलाई एकाकार गर्नका लागि एजेण्डा र मुद्दा मिल्ने राजनैतिक पार्टी संगठनहरुसँग एकता, मोर्चा र सहकार्य गर्न यो बैठकले नीतिगत निर्णय पारित गरेको छ । 

 ७. यस पार्टी केन्द्रीय सदस्यद्वय पम्फा किराती र पाण्डव राईलाई विगत दुइ वर्ष देखि अनर्गल र कृत्रिम मुद्दा सिर्जना गरी जेलमा राखिएको छ । यस पार्टी समावेश भई शान्तिपूर्ण राजनीतिक अभ्यास थालनी गर्नु अगाडिको पृष्ठभूमिलाई जवर्जस्त जोडेर धरपकड र जेल चलान गरिनु न्यायसंगत नभएको यो बैठक ठहरगर्दै निजहरुलाई तत्काल रिहाई गरिनु पर्दछ भनि माग गर्दछ । निजहरुको रिहाईका लागि आवश्यक पहल गर्न कार्यवाहक महसचिव छविसुब्बा सङबाङफेको संयोजकत्वमा प्रतिनिधि टोली निर्माण गरिएको छ । आस्थाको बन्दी रिहाई गर्ने पार्टी आग्रह सरकारले सुनुवाई नगरेमा यसलाई आन्दोलनको अभिन्न अङ्ग बनाईने यो बैठकबाट सचेतना दिन चाहन्छौं । यसका साथै आगामी २०६९ बैशाख ३१ गते हुन गईरहेको एकीकृत लिम्बुवान स्वायत्त राज्य परिषदको लिम्बुवान बन्दको कार्यक्रमलाई पूर्णरुपमा सफल बनाउनका लागि पार्टी हाई कमाण्ड र सम्पूर्ण संयन्त्रहरु लिम्बुवान केन्द्रित हुने निर्णय गरिएको छ । 

 छविसुब्बा सङबाङफे

 का.वा.महासचिव केन्द्रीय कार्यसमिति 

संघीय अभिवाद !

 मिति २०६९ बैशाख २० गते